De nijste ûntwikkelingen rûnom de Lelyline fernuverje ús net. De reservearring fan 3,4 miljard euro is troch it kabinet Schoof al foar it grutste part leech helle, mei no noch mar 600 miljoen euro yn de pot. It advys fan it Kolleezje fan Ryksbouwmeester en Ryksadviseurs oan de Stjoergroep Lelyline fan 20 jannewaris is ek al kritysk: dat stelt de fraach as it middel – de Lelyline, wol it doel – brede wolfeart yn de noardlike regio, helje sil.

Dan ha wy freed it nije koälysje-akkoart ek besjoen. Foar it earst sûnt 2021 stiet de Lelyline der net mear yn. It liket derop dat de prioriteiten oars lein wurde. Benammen it by de tiid bringen fan besteande ynfrastruktuer. De FNP is dêr ek foarstanner fan en hat dat nei it plunderjen fan de reservearre pot yn april 2025 ek nei bûten brocht. Sawol yn in ynstjoerd stik as ek yn Provinsjale Steaten. De prioriteiten moatte oars lein wurde. Sawol yn de polityk as yn de lobby. Der is hjir yn Fryslân ek genôch ynfrastruktuer dy’t net mear by de tiid is.

De FNP beskôget de oplossing fan Lelyline-gesant Klaas Knot net as realistysk: der sil net alle jierren 400 miljoen reservearre wurde, wylst der genôch oare prioriteiten binne. Knot stelt yn syn advys dat ek de regio substansjeel meibetelje moat. Dat jild is der net. Fierder is it goed dat de loftballon, dat definsje of de EU in grut part wol betelje sille, ek trochpript is.

Ek dat is foar de FNP net nij: wy binne wy fan it begjin ôf al kritysk west op it winsktinken. Yn it bestjoersakkoart stiet dat wy de ûntwikkelingen folgje sille yn it belang fan Fryslân. Neffens ús soe it no goed wêze in konklúzje te lûken, nei al it foarwurk dat dien is. Wy riede dêr ek skriftlike fragen foar ta. Oant dy tiid is dit de reaksje fan de FNP Steatefraksje.

https://www.fnp.frl/blog/nijs/reaksje-fnp-steatefraksje-op-lelyline-advies-knot/