Rodil: “Por moita propaganda que use Rueda non vai conseguir tapar a súa incompetencia para resolver os problemas de Galiza

A viceportavoz do BNG, Olalla Rodil asegura que Rueda, co seu acto de medio mandato que celebra este sábado en Vigo baixo o lema ‘Galiza goberna’, “intenta tapar con quilos e quilos de propaganda a súa incompetencia para resolver os problemas das galegas e galegos”, en referencia á sanidade, o dereito a unha vivenda ou ao espolio dos recursos naturais de Galiza.

Afondando nas eivas da sanidade, a deputada nacionalista sinala os recortes do PP como causa de que haxa que esperar “15 días ou máis” por unha cita no médico de cabeceira, ou que as nenas e nenos deste País “non teñan a atención que merecen e que necesitan”, lamenta, subliñando que en 120 concellos non hai pediatra e que noutros 96 só hai esta especialidade unhas poucas horas algún día da semana.

“Isto non pasa porque si. É a consecuencia directa dos 1.600 millóns de euros que o PP recortou en Atención Primaria desde 2009”, manifesta.

Sinala ademais que Rueda conseguiu “poñer de acordo a todo o mundo no mal que está a sanidade pública galega hoxe”, onde tamén está a haber problemas nos hospitais. Rodil referiuse neste punto ao comunicado “conxunto que presentaron todos os xefes de urxencias de Galiza no que denuncian a falta de persoal e de recursos para garantir a asistencia sanitaria.

En materia de vivenda, a viceportavoz do BNG acusa o Partido Popular de converter o dereito a unha teito digno nun “privilexio”, con alugueres cada vez máis caros e máis de 32 mil persoas agardando por unha vivenda pública no rexistro de demandantes.

“E que fai agora? Inundarnos de propaganda con anuncios de miles de vivendas públicas pero a realidade, cos datos do Instituto Galego de Estatística IGE) na man, é que a día de hoxe só hai 485 vivendas empezadas”, recalca.

Pero para a deputada nacionalista, se algo define o goberno de Rueda, é o espolio da riqueza de Galiza. “O PP actúa como cabalo de Troia do lobby eléctrico e mineiro; vémolo co boom eólico depredador, co proxecto de Altri, mesmo atacando a independencia xudicial para defender os intereses dun puñado de empresas, vendendo os recursos naturais e a riqueza de Galiza a prezo de saldo”, incide.

Ademais, critica que o Goberno do PP anuncie agora que “van resucitar” as minas de Corcoesto, San Finx e Santa Comba, despois de que fosen amplamente rexeitadas socialmente polos enormes prexuízos ambientais e sociais que suporían.

En definitiva, conclúe, “Rueda e o PP non van tapar, por moitos quilos de propaganda que usen, a súa verdadeira cara: a do desmantelamento dos servizos públicos, o recorte de dereitos e o espolio da riqueza deste País”.

Fronte á incapacidade de Rueda, Rodil asegura que “seguimos traballando co convencemento de que as galegas e galegos merecen máis e teñen no BNG de Ana Pontón un proxecto e unha alternativa sólida para mellorar as súas vidas”.

https://www.bng.gal/articulo/novas/rodil-moita-propaganda-que-use-rueda-non-vai-conseguir-tapar-sua-incompetencia-resolver-problemas-galiza/20260516160733042808.html