BNG acusa o PP de non facer “absolutamente nada” para garantir o acceso á saúde da veciñanza de Cervantes

Olalla Rodil asegura que a accesibilidade e a sanidade pública brilla pola súa ausencia cando a xente se ten que desprazar para ser atendida

O PP votou en contra de cubrir permanentemente as dúas prazas do centro de saúde de San Román e a restitución da atención sanitaria en Doiras

A deputada do BNG por Lugo, Olalla Rodil, criticou a inacción do PP á hora de garantir o acceso á saúde da veciñanza de Cervantes ao votar en contra da cobertura permanente das dúas prazas de persoal facultativo no centro de saúde de San Román de Cervantes así como da restitución da atención sanitaria no consultorio de Doiras.

Dirixíndose á deputada do PP no Parlamento galego e concelleira en Cervantes, María Encarnación Amigo, recriminoulle que “sabe perfectamente” da situación que está a sufrir a veciñanza e que “non fixeron absolutamente nada, máis que enganar á xente asegurando que non mes de outubro se restituiría todo”. “Non manipule a realidade”, emprazou.

A deputada de Lugo reclamoulle ao PP, por “honestidade e respecto” á veciñanza, que “non lles siga mentindo” con promesas como as de que ía volver reabrir o consultorio de Doiras ou que os e as doentes ían ser atendidos con todas as garantías e que se despregaría no concello o programa de enfermería a domicilio do Sergas “Ariadna”. “Preguntei aínda hoxe e diso non hai nada”, afeou.

Tras rexeitar o BNG a emenda do PP que engadía que se cubrirían as prazas “cando haxa médicos”, a proposta nacionalista foi tombada polos votos en contra das bancadas populares.

Na súa intervención na Comisión 5ª, a deputada nacionalista explicou que en ano e medio, o concello de Cervantes pasou de ter dous médicos e unha enfermeira no centro de saúde de San Román e un médico e unha enfermeira en Doiras a atender toda a poboación, cun único médico e unha enfermeira para todo o concello .

No caso de Doiras, recordou que se pechou o consultorio no verán de 2024 e que cando o reabriron, xa só prestaba atención dous días á semana. “Non se cubriu a praza que quedou vacante, só se desprazaba un dos médicos de San Román a Doiras de xoves a venres”, precisou.

No que respecta ao centro de Saúde de San Román, a deputada explicou que un dos médicos cambiou de destino no concurso de traslados e que, como só queda un en todo o concello de Cervantes, Doiras está pechado e toda a poboación recibe atención no centro de saúde de San Román, cunha única médica e unha enfermeira.

A deputada lembrou que en total estamos a falar de 945 pacientes, con 238 cartillas en Doiras e con 378 e 329 dos dous médicos de San Román. Rodil argumentou neste punto que a sanidade perde a súa condición de calidade, accesibilidade e proximidade cando as persoas adscritas a Doiras se ven obrigadas a percorrer máis de 20 quilómetros para ver un médico e que ademais carecen de transporte e dependen do seu propio vehículo ou de que o leve algún veciño ou pagar un taxi.

“Cervantes non é Lugo nin Santiago”, comparou, lembrando que se trata dun concello de alta montaña cunha superficie de 277,63 km² e cunha poboación que de media ten 60 anos. “A proximidade e a accesibilidade brilla pola súa ausencia”, criticou.

https://www.bng.gal/articulo/novas/bng-acusa-pp-non-facer-absolutamente-nada-garantir-acceso-saude-da-vecinanza-cervantes/20260312135840042409.html