BNG exixe ao Goberno actuar ante a situación das vivendas da SAREB en Ares e garantir a protección das familias

Néstor Rego denuncia a pasividade da SAREB e reclama garantir a protección das familias residentes nos bloques 11 e 12 da Avenida Federico García Expósito

O deputado do BNG demanda realizar unha avaliación individualizada e adoptar medidas urxentes para garantir o dereito a unha vivenda digna

O deputado do BNG, Néstor Rego, denuncia a grave situación que se está a vivir nas vivendas, propiedade da SAREB, sitas nos bloques 11 e 12 da Avenida Federico García Expósito no Concello de Ares onde residen arredor de 34 familias. A organización nacionalista reclama ao Goberno actuar para garantir condicións dignas de habitabilidade e a protección das persoas residentes.

A organización nacionalista denuncia que o bloque número 12 presenta importantes deficiencias, con filtracións de auga que afectan mesmo aos garaxes e outros problemas estruturais que non aseguran unhas condicións mínimas de habitabilidade, o que evidencia unha clara pasividade por parte da SAREB como propietaria.

Ademais, a organización nacionalista alerta dunha situación “extremadamente grave” derivada dunha presunta estafa nos alugueiros, xa denunciada ante a Fiscalía, onde a empresa interposta xestionaría os contratos aproveitando o limbo xurídico dos inmóbeis embargados. Segundo se recolle nos contratos, o prezo do alugueiro incluía as subministracións, mais estas non estarían sendo asumidas polas empresas intermediarias. A isto súmase unha situación “absolutamente irregular” no subministro eléctrico, xa que os edificios continúan con luz de obra e sen contadores individualizados.

O deputado do BNG no Congreso critica a falta de colaboración da SAREB coa Fiscalía, por non responder á denuncia presentada, o que contribuíu ao arquivo do caso e deixa nunha situación de indefensión ás persoas afectadas.

“Estamos ante un caso claro de abandono de responsabilidades por parte da SAREB, unha entidade maioritariamente pública que ten a obriga de garantir o bo estado dos seus inmóbeis e de evitar abusos contra as persoas inquilinas” denuncia Néstor Rego.

Neste contexto, o deputado nacionalista reclama ao Goberno esclarecer de inmediato a situación administrativa dos bloques e confirmar se a SAREB ten coñecemento das graves deficiencias e irregularidades existentes, así como das prácticas denunciadas no alugueiro das vivendas.

Así mesmo, Néstor Rego exixe explicacións polo feito de que a SAREB non atendese os requirimentos da Fiscalía e demanda que se depuren responsabilidades por esta inacción.

Ante a información recente sobre o inicio dun proceso de dación en pagamento dos inmóbeis, a organización nacionalista reclama total transparencia e información para as persoas inquilinas, así como garantías de que non se verán expulsadas das súas vivendas.

“O Goberno debe garantir que estas familias poidan continuar vivindo nestes pisos en condicións dignas e con alugueiros accesíbeis, e que non queden nunha situación de desamparo” reivindica Rego.

Por último, a organización nacionalista demanda que a SAREB realice unha avaliación individualizada da situación de cada unidade familiar e adopte medidas urxentes para protexer especialmente ás persoas en situación de vulnerabilidade, garantindo o seu dereito a unha vivenda digna.

https://www.bng.gal/articulo/novas/bng-exixe-ao-goberno-actuar-situacion-das-vivendas-da-sareb-ares-garantir-proteccion-das-familias/20260402122821042553.html