BNG urxe o Goberno a reverter a externalización informática da AEAT e reforzar o cadro de persoal na Galiza

Néstor Rego denuncia que a Axencia Tributaria destinou máis de 472 millóns de euros a empresas privadas desde 2023 mentres mantén vacantes sen cubrir e persoal insuficiente nas delegacións galegas

O deputado do BNG no Congreso, Néstor Rego, vén de rexistrar iniciativas para reclamar ao Goberno do Estado a reversión da progresiva privatización dos servizos informáticos da Axencia Estatal de Administración Tributaria (AEAT), así como a adopción de medidas urxentes para reforzar os cadros de persoal e cubrir as numerosas vacantes existentes, particularmente na Delegación Especial da Galiza.

Rego denuncia que a AEAT leva anos afondando nun modelo de dependencia de empresas privadas para o desenvolvemento de funcións informáticas estratéxicas mentres desatende o fortalecemento dos seus propios medios técnicos e humanos.

“Estamos ante unha cuestión que afecta directamente a soberanía tecnolóxica da Administración pública, a protección dos datos fiscais da cidadanía e a calidade dun servizo público esencial. O Goberno debe abandonar esta política de privatización e apostar por reforzar as capacidades propias da Axencia Tributaria” defende Rego.

Segundo a documentación analizada polo BNG, a AEAT contratou entre 2023 e 2026 servizos informáticos por valor superior aos 472 millóns de euros. Trátase de contratos vinculados á xestión das telecomunicacións, sistemas de Big Data, investigación da fraude, transformación dixital ou operación dos sistemas informáticos da Axencia, moitos deles con duración de varios anos e cunha presenza recorrente de ofertas únicas nos procesos de licitación.

Para o deputado nacionalista, “non é razoábel que mentres se destinan centos de millóns de euros á contratación externa, non exista ningún plan para recuperar capacidades técnicas propias nin para reforzar os corpos informáticos da AEAT”.

Neste sentido, o BNG demanda a posta en marcha dun plan de recuperación progresiva dos servizos actualmente privatizados, con calendario e obxectivos verificábeis, así como a convocatoria inmediata dos paneis de mobilidade para os corpos informáticos e, en particular, para o Corpo de Técnicos Auxiliares de Informática.

“A Axencia Tributaria non pode seguir dependendo cada vez máis de empresas privadas para funcións que poden e deben ser desenvolvidas por persoal público especializado. É necesario recuperar coñecemento, capacidade técnica e control sobre sistemas que manexan información especialmente sensíbel da cidadanía” salienta Rego.

Unha situación especialmente grave na Galiza

O BNG tamén traslada ao Congreso a situación que padecen as Administracións e Delegacións dependentes da Delegación Especial da AEAT na Galiza, onde unidades de Informática, Xestión, Recadación, Inspección e Aduanas continúan funcionando con cadros de persoal moi por debaixo do mínimo necesario.

Segundo denuncia o deputado nacionalista, as vacantes acumuladas e a falta de reposición do persoal están a provocar unha crecente sobrecarga de traballo e dificultades para garantir unha atención adecuada á cidadanía.

“A precariedade dos cadros de persoal da AEAT na Galiza é unha realidade coñecida e prolongada no tempo. O persoal está asumindo funcións e cargas de traballo que corresponden a postos que permanecen baleiros mentres o Goberno continúa sen adoptar solucións efectivas” critica o deputado do BNG.

Por este motivo, a organización nacionalista reclama ao executivo a cobertura inmediata das prazas vacantes e a adopción dun plan específico para reforzar os recursos humanos na Galiza.

“A cidadanía galega ten dereito a un servizo tributario público dotado dos medios necesarios e o persoal da AEAT ten dereito a desenvolver o seu traballo en condicións dignas. O Goberno debe actuar para rematar coa falta de persoal e garantir un servizo público de calidade na Galiza” sentenza Néstor Rego.

https://www.bng.gal/articulo/novas/bng-urxe-goberno-reverter-externalizacion-informatica-da-aeat-reforzar-cadro-persoal-galiza/20260601120348042913.html