Pontón trasladará ao Goberno de Lula da Silva a capacidade das empresas galegas para mellorar a relación comercial co Brasil

Propón unha estratexia institucional e de internacionalización específica para abrir mercados aos sectores produtivos galegos no país americano

Aposta por impulsar a Lei Paz Andrade para aproveitar a oportunidade tanto económica como cultural que representa a lusofonía para Galiza

A portavoz nacional, Ana Pontón, trasladará ao Goberno de Lula da Silva que Galiza ten empresas e sectores produtivos “de primeiro nivel”, capaces de mellorar as relacións comerciais con Brasil, un dos grandes países do mundo e un xigantesco mercado de 213 millóns de habitantes que representa “unha oportunidade, tanto desde o punto de vista económico, como cultural”.

Así o avanza desde Brasilia, onde desenvolve xunto á eurodeputada e responsable da Área de Internacional, Ana Miranda, a primeira xornada da súa viaxe a Brasil no marco da celebración do 8º Congreso do Partido dos Traballadores do presidente Luiz Inácio de Lula da Silva, viaxe na que a líder do BNG manterá diversos encontros bilaterais con responsables do PT e do goberno brasileiro.

Pontón destaca a importancia de aproveitar o enorme potencial económico que representa o país americano para as empresas e os sectores produtivos galegos, para o que considera preciso corrixir o actual desequilibrio comercial.

Recorda, neste punto, que as empresas galegas facturan co mercado brasileiro unha cifra moi modesta, 70 millóns de euros, mentres que Brasil vende a Galiza produtos por valor de 250 millóns de euros, tres veces máis.

Ante esta realidade, a portavoz nacional aposta por poñer en marcha unha “estratexia institucional e comercial para abrir mercados” que permita ás empresas galegas “vender máis” no país americano e avanzar na internacionalización dos sectores económicos do País, dado que hai “marxe de mellora”.

Neste sentido, sinala que sectores como o da pesca, a acuicultura ou a construción naval están entre os de maior potencial comercial, con áreas de negocio como a tecnoloxía pesqueira, a sustentabilidade mariña ou a loxística portuaria.

“Galiza ten empresas e sectores produtivos moi competitivos e somos un País que ten todo para acoller proxectos de vangarda”, subliña a líder do BNG, quen tamén trasladará ao Executivo brasileiro a potencialidade galega para acoller proxectos de futuro, sempre desde o respecto ao territorio e ao medio ambiente. “Noutras palabras, portas abertas a investimentos de vangarda e de futuro”, sintetiza.

Outro aspecto clave que Pontón abordará na súa axenda é o de potenciar as relacións culturais, tendo en conta a fortaleza que dá a Galiza e Brasil compartir unha lingua común. “A lusofonía é unha oportunidade tanto cultural como económica que debemos impulsar e aproveitar”, subliña para apuntar ao necesario desenvolvemento da Lei Paz Andrade, aprobada e publicada no DOG pero aínda sen desenvolver, como instrumento para acadar este obxectivo.

A portavoz nacional tamén aposta por estreitar relacións entre ámbolos dous países, para o que considera fundamental promover un maior intercambio universitario e a colaboración no ámbito da investigación, particularmente en áreas como as ciencias do mar, a biotecnoloxía, a lingua e a cultura.

“En Brasil, ademais residen 54.000 galegos e galegas, a segunda comunidade de residentes de ascendencia galega máis grande do mundo, e tamén queremos compartir como está a comunidade, que proxectos ten e como poden ver a Galiza como un lugar no que poder investir e ao que retornar”, conclúe.

https://www.bng.gal/articulo/novas/ponton-trasladara-ao-goberno-lula-da-silva-capacidade-das-empresas-galegas-mellorar-relacion-comercial-co-brasil/20260424180132042673.html