BNG reivindica o seu papel nas Cortes do Estado na defensa de Narón e Galiza

Néstor Rego destaca a influencia do BNG para levar a cabo políticas transformadoras e en beneficio das maiorías sociais, así como o impulso da Axenda Galega

“Se cun único deputado e unha senadora fomos quen de conseguir todo isto, que non seríamos capaces de lograr con máis representación” engade Mosquera

Geno Carballeira subliña o traballo desenvolvido polo BNG para dar resposta ás necesidades reais da veciñanza de Narón: “conseguiu frear as corruptelas da SAREB”

O BNG celebra un acto aberto coa veciñanza de Narón para dar conta do traballo que está a realizar a formación nacionalista nas Cortes do Estado e os avances conseguidos en beneficio da sociedade galega. O encontro conta coa participación do deputado do BNG no Congreso, Néstor Rego, o concelleiro e candidato do BNG á alcaldía de Narón, Geno Carballeira, e a concelleira nacionalista, Beatriz Mosquera.

Durante a súa intervención, Néstor Rego pon en valor o papel decisivo do BNG nas Cortes do Estado, destacando que, cun deputado e unha senadora, a organización está a cumprir cos seus compromisos adquiridos en campaña electoral: “ser muro de contención frente á dereita ultra e a ultradereita, impulsando políticas verdadeiramente de esquerdas e transformadoras, e colocar enriba da mesa a Axenda Galega”.

No ámbito das políticas transformadoras, Rego salienta medidas como o aumento das pensións mínimas e non contributivas por riba do IPC, así como a ampliación das semanas dos permisos para familias monomarentais e monoparentais.

No relativo á Axenda Galega, destaca avances como as novas bonificacións de até 75% na AP-9 e o impulso á implantación dun servizo ferroviario de proximidade, unha reivindicación histórica para rematar coa discriminación que sofre Galiza neste ámbito. A quita dun terzo da débeda da Galiza, actuacións en infraestruturas estratéxicas para o noso País son outros dos exemplos do que o BNG foi capaz de conseguir.

Pola súa parte, Geno Carballeira destaca a relevancia do traballo desenvolvido por Néstor Rego no Congreso para dar resposta ás necesidades da veciñanza de Narón: “levou as corruptelas da SAREB no barrio de Piñeiros, conseguindo frear a intención do Goberno de botar a familias enteiras das súas vivendas; tamén logrou que Narón fose recoñecido como un dos concellos afectados polo peche da central térmica das Pontes” lembra o candidato do BNG á alcaldía de Narón nas vindeiras eleccións municipais.

Finalmente, Beatriz Mosquera pon o acento na necesidade de reforzar a presenza do BNG nas Cortes do Estado: “Se cun deputado e cunha senadora somos capaces de conseguir todo isto, que non seríamos capaces de lograr con máis representación para condicionar aínda máis as políticas do Goberno e mellorar a calidade de vida das maiorías sociais e do conxunto do pobo galego” sinala durante o encontro coa veciñanza.

https://www.bng.gal/articulo/novas/bng-reivindica-seu-papel-nas-cortes-do-estado-defensa-naron-galiza/20260327205335042529.html