BNG acusa o PP na Xunta de actuar como “lacaio” de Monbus mentres 3.000 traballadores seguen co convenio bloqueado

O portavoz de emprego do BNG no Parlamento, Mon Fernández responsabilizou a Xunta do PP do conflito laboral no sector do transporte de viaxeiros por estrada na provincia da Coruña e chamou á cidadanía a participar na manifestación convocada para este domingo en Compostela para un reclamar un convenio e uns servizos dignos e do século XXI e contra o monopolio e as prácticas fraudulentas do PP.

Fernández sinalou que desde finais de 2025 os tres sindicatos maioritarios de Galiza —CiG, ,CC.OO, e UGT— viñan advertindo do bloqueo por parte da patronal, un bloqueo que na práctica equivale ao bloqueo por parte de Monbús, empresa que controla de facto o sector e a asociación maioritaria da patronal na mesa de negociación e á que cualificou como “criatura do PP”. O convenio leva catro anos caducado e xa foi superado pola normativa vixente en materias como a conciliación ou o control horario.

Denuncia que a Xunta de Rueda actúa como "lacaio" de Monbús mentres 3.000 traballadores e traballadoras e milleiros de usuarios e usuarias do transporte por estrada da Coruña sofren as consecuencias do bloqueo do convenio colectivo. "Milleiros de persoas están a ser empregadas por MONBUS como reféns, mentres a Xunta, autoridade competente, compórtase como un lacaio servil de Monbús e de Raúl López”, o seu propietario, a quen sinalou como o gran beneficiario das concesións públicas de transporte en Galiza.

O deputado nacionalista detallou as catro responsabilidades que, ao seu xuízo, a Xunta de Rueda está a incumprir neste conflito: a súa contribución á posición de dominio de Monbús a través de concesións públicas en condicións fraudulentas; o seu papel como principal contratista das liñas de transporte en autobús en Galiza; a súa condición de autoridade reguladora do sector con obriga de velar pola competencia e a súa función como autoridade laboral responsable da negociación colectiva.

Segundo argumentou Fernández, as reivindicacións dos sindicatos son de carácter básico: adaptar o convenio á normativa actual, acadar incrementos salariais dignos cunha cláusula de revisión ligada ao IPC, mellorar os dereitos do persoal acompañante do transporte escolar —maioritariamente mulleres e con contratos que ás veces non superan os 114 minutos— ou incluír unha cláusula de xubilación parcial que permita o relevo xeracional antes dos 67 anos, reducindo así o risco para os e as viaxeiras e para a seguridade viaria en xeral.

Na súa quenda de réplica, o deputado nacionalista evidenciou a “vergoña” que supón a postura amosada polo PP ao dicir que non ten competencias na materia. “Vaia se ten”, replicou, “en competencias como contratista, como regulador, como defensor da competencia, como autoridade laboral”, recordoulle. O PP votou en contra da iniciativa do BNG que lle reclamaba á Xunta exercer ditas competencias.

“Ao mesmo tempo non ten pudor ningún en recoñecer que o único que fixo foi determinar os servizos mínimos e despois dirixirse á policía para garantir eses servizos mínimos”, engadiu, aclarando que nesa materia a Xunta non ten competencias pero que “non lle custou nada dirixirse á Delegación do Goberno para garantir a presenza de policía”.

https://www.bng.gal/articulo/novas/bng-acusa-pp-xunta-actuar-como-lacaio-monbus-mentres-3000-traballadores-seguen-co-convenio-bloqueado/20260219124244042261.html