BNG urxe actuacións na AP-9 para mellorar a seguranza viaria

Néstor Rego: “Nin os galegos e galegas poden seguir pagando unha das peaxes máis caras do Estado por circular por unha infraestrutura insegura, nin o Goberno pode mirar cara a outro lado”

O BNG pide ao Goberno exixir á concesionaria actuacións urxentes para garantir un mantemento adecuado, en consonancia cos seus elevados beneficios

O deputado do BNG lembra que continúa a traballar para conseguir unha AP-9 galega e libre de peaxes

O deputado do BNG no Congreso, Néstor Rego, vén de rexistrar iniciativas para exixir ao Goberno do Estado –no concreto ao Ministerio de Transportes- actuación urxentes ante o grave deterioro do firme da AP-9. A organización nacionalista critica que, sendo das autoestradas máis caras do Estado, o estado de conservación está a xerar preocupación entre as persoas usuarias e supón un risco para a seguranza viaria.

Néstor Rego denuncia que “non é admisíbel que unha infraestrutura estratéxica como a Autoestrada do Atlántico, pola que a cidadanía galega paga peaxes abusivas, presente un estado de conservación deficiente que compromete a eguranza viaria”. Neste sentido, lembra que a autoestrada “leva anos máis que amortizada, mentres se mantén unha prórroga até 2048, acordada polo Goberno do PP de Aznar e hoxe cuestionada pola súa legalidade”.

O deputado nacionalista subliña que, malia as bonificacións conseguidas nos últimos anos polo BNG, “segue sendo imprescindíbel avanzar cara a unha AP-9 pública, galega e gratuíta”, mais insiste en que, mentres continúe baixo concesión, o Ministerio de Transportes debe garantir o seu correcto mantemento e condicións óptimas de seguranza.

As iniciativas presentadas polo BNG fanse eco das denuncias reiteradas de transportistas e condutores, que alertan da presenza de fochancas, gretas e outras deficiencias en distintos treitos da autoestrada, agravadas polos temporais do pasado inverno e pola falta de investimentos en conservación por parte da concesionaria. Unha situación que contrasta cos elevados beneficios da empresa, con máis de 210 millóns de euros en ingresos por peaxes e 90,3 millóns de beneficio neto no ano 2024.

Ademais, o deputado BNG pon o foco no último informe da asociación Automobilistas Europeos Asociados (AEA), que sitúa numerosos treitos da AP-9 entre os máis perigosos do Estado no período 2020-2024. Segundo este estudo, a Galiza concentra tres de cada dez tramos de autoestrada con maior índice de perigosidade, moitos deles nesta vía, con até 24 puntos catalogados de máximo risco.

“O Ministerio de Transportes debe avaliar con rigor o informe da AEA e recoñecer a gravidade da situación, asumindo que a Galiza concentra unha porcentaxe elevada e inasumíbel de tramos de alto risco, e adoptar medidas inmediatas” reclama Rego. Do mesmo xeito, o deputado entende que o Goberno debera atender e dar resposta ás denuncias das persoas usuarias sobre o mal estado do firme, con inspeccións e actuacións inmediatas

Segundo explica Rego, o executivo debe exixir á concesionaria da AP-9 a execución dos investimentos necesarios para garantir un mantemento adecuado, en consonancia cos seus elevados beneficios. A todo isto, engade o deputado, débese estabelecer un calendario concreto e público sobre as actuacións de mellora, a comezar polos puntos quilométricos de maior perigosidade.

“Nin os galegos e galegas poden seguir pagando unha das peaxes máis caras do Estado por circular por unha infraestrutura insegura, nin o Goberno pode mirar cara a outro lado” sentenza Néstor Rego, quen reclamou “actuacións inmediatas e contundentes para poñer fin a esta situación intolerábel”.

https://www.bng.gal/articulo/novas/bng-urxe-actuacions-ap-9-mellorar-seguranza-viaria/20260330114340042536.html