BNG eríxese como a única forza política que defende o sector agrogandeiro galego frente á ameaza de Mercosur

Néstor Rego e Carme da Silva destacan en Ourense os logros conseguidos polo BNG durante esta lexislatura: aumento das pensións mínimas, impulso á modernización da rede ferroviaria interna ou as históricas bonificacións na AP-53, entre outras

Luís Seara sinala a necesidade de que Ourense conte con representación nacionalista nas Cortes: “é fundamental que o BNG conte con máis forza”

O Bloque Nacionalista Galego celebra en Ourense un acto público para dar a coñecer o traballo realizado nas Cortes do Estado e os avances conseguidos pola organización nacionalista en beneficio da sociedade galega. No encontro participa o deputado do BNG no Congreso, Néstor Rego, a senadora do BNG, Carme da Silva, e o portavoz municipal do BNG en Ourense, Luis Seara.

Infraestruturas ferroviarias e viarias do século XXI

Pola súa parte, o deputado nacionalista pon en valor o papel decisivo do BNG na defensa dos intereses da Galiza en Madrid e salienta avances concretos en materia de infraestruturas, especialmente no ámbito ferroviario. “O BNG está demostrando que cando ten forza en Madrid, a Galiza avanza e consegue investimentos para mellorar a mobilidade interna do país” destaca Rego.

O deputado lembra que a organización nacionalista conseguiu impulsar actuacións chave como a electrificación e modernización da liña ferroviaria entre Ourense e Lugo, unha demanda histórica que permitirá mellorar os tempos de viaxe e a calidade do servizo. Ademais, subliña o avance no impulso dos servizos ferroviarios de proximidade, dos que xa se adiantou que para a Galiza se contemplan catro liñas e unha liña complementaria de ancho métrico.

Rego tamén incide na necesidade de continuar mellorando as infraestruturas viarias, tal e como está recollido no Acordo de Investidura conseguido, comezando polo arranxo integral da N-120 e a mellora da A-52.

“Conseguimos por primeira vez bonificacións nas peaxes da AP-53 de até 75% para persoas usuarias recorrentes do tramo Ourense-Santiago” salienta Rego.

Impulso de políticas sociais e defensa do sector agrogandeiro galego

Pola súa parte, a senadora Carme da Silva sinala os avances conseguidos polo BNG en materia de políticas sociais e lembra que a suba das pensións mínimas e non contributivas por riba do IPC é un logro da organización nacionalista recollido no Acordo de Investidura e que, no caso de Ourense, perciben este incremento máis de 6.000 persoas.

Da Silva tamén destaca tamén o avance na ampliación dos permisos de paternidade e maternidade até as 20 semanas, unha medida que, malia non estar completamente desenvolvida, xa se sitúa en 19 semanas.

Por outra parte, a senadora nacionalista diferenza o BNG do resto de forzas políticas a respecto do acordo comercial entre a Unión Europea e Mercosur, advertindo do impacto negativo que podería ter para o sector agrogandeiro galego.

“O BNG sempre votou en contra do acordo UE-Mercosur polos graves prexuízos para o sector agrogandeiro galego; o PP di unha cousa aquí ao sector mais cando ten que votar sempre o fai a favor” critica, lembrando que a pasada semana o Partido Popular rexeitou no Senado unha moción do BNG que pedía rexeitar este acordo.

Un BNG con máis forza é un Ourense mellor

Finalmente, o portavoz municipal do BNG en Ourense, Luís Seara, reivindica a necesidade de que Ourense conte con representación nacionalista nas Cortes do Estado. “Ourense non pode seguir no estado de abandono ao que PP e PSOE o teñen sumido durante anos. É fundamental que o BNG conte con máis forza e que Ourense teña representación nacionalista propia nas Cortes para defender con firmeza os intereses da nosa terra” finda.

https://www.bng.gal/articulo/novas/bng-erixese-como-unica-forza-politica-que-defende-sector-agrogandeiro-galego-frente-ameaza-mercosur/20260306210341042372.html