BNG denuncia que a presión do PP e da Xunta están detrás da cancelación da reunión do comisario Hansen con Pontón

Ana Miranda e Ana Pontón

O BNG quere denunciar publicamente un feito que considera de extrema gravidade: a presión do Partido Popular e do goberno de Rueda para cancelar a reunión prevista para este martes en Bruxelas co comisario de Agricultura, Christophe Hansen, encontro que estaba pechado e confirmado desde o pasado 13 de febreiro na sede da Comisión Europea.

Sen embargo, despois de que este pasado domingo o BNG fixera pública en comunicado de prensa esa xuntanza entre a líder nacionalista e o comisario popular, na que tamén ía tomar parte a eurodeputada Ana Miranda, o gabinete de Hansen trasladou nun correo electrónico emitido ás 15.30 dun domingo a cancelación da reunión, alegando un cambio “inesperado” na axenda do titular de Agricultura.

Para o BNG ese cambio inesperado non é outra cousa máis que as presións do Partido Popular e da Xunta, demostra o talente antidemocrático do PP.

“Rueda non pode soportar que se visualice que o BNG faga o que el non fai: defender ao sector agrogandeiro galego ameazado polo acordo da Unión Europea con Mercosur”, destaca a portavoz nacional, “non pode soportar o contraste entre a imaxe dun presidente da Xunta dicindo si bwana ao acordo con Mercosur, mentres o BNG defende diante do comisario de Agricultora os intereses dos nosos gandeiros e gandeiras pedindo con total claridade a retirada dese tratado porque é nefasto para o noso sector, en particular para os produtores e produtoras de carne”.

Pontón explicou que “a produción nos Países do Mercosur faise con estándares ambientais, sanitarios e de benestar animal menos estritos que os que se aplican aos nosos produtores e iso supón vantaxes á hora de competir, porque teñen menos costes o que lles permite abaratar prezos. E nunha Galiza na que predominan explotacións de tamaño medio, unha caída do prezo pode supoñer a diferencia entre viabilidade ou peche”, advirte.

En todo caso, a líder do BNG vai seguir coa súa axenda en Bruxelas para defender os intereses dos galegos e das galegas por moito que lle pese ao Partido Popular, cunha serie de encontros de traballo con eurodeputadxs dos grupos políticos da esquerda, -Bloco de Esquerdas de Portugal, Sinn Feín ou ALE, empezando por cunha reunión coa eurodeputada Saskia Bricmont do Grupo Verdes/ALE, unha das ponentes e voces máis destacadas á hora de promover a impuganación do tratado Mercosur ante o Tribunal de Xustiza da Unión Europea ao consideralo contrario aos tratados. Axenda que continuará mañá en Bruxelas, co financiamento e a xestión dos fondos de cohesión como principal asunto para Galiza, nun momento en que se está negociando o Marco Financeiro Plurianual 2028-2034.

Pontón tamén aproveitou a súa primeira xornada no Parlamento Europeo para lamentar o “vergoñento” papel que está xogando a Unión Europea ante o ataque ilegal de Trump-Netayanhu contra Irán, unha acción bélica ilegal que xa custou a vida de centos de persoas e que Bruxelas nin siquera é capaz de condenar.

https://www.bng.gal/articulo/novas/bng-denuncia-que-presion-do-pp-da-xunta-estan-detras-da-cancelacion-da-reunion-do-comisario-hansen-ponton/20260303192454042350.html