A portavoz nacional, Ana Pontón, xunto coa eurodeputada Ana Miranda, mantivo na súa primeira xornada en Bruxelas reunións con parlamentarios de diferentes forzas de esquerda e nacionalistas para sumar aliados contra o acordo de Mercosur, que aínda ten que volver ao Parlamento para a súa aprobación definitiva.
“Queremos seguir sumando apoios para frear este acordo comercial que é claramente lesivo cos nosos gandeiros e gandeiras, porque obriga a competir en inferioridade de condicións”, subliña Pontón, quen contrapuxo esta defensa do sector que está facendo o BNG ante as institucións europeas co papel do presidente da Xunta, “que ven dicir si bwana a este tratado escondéndose detrás dunhas salvagardas que son papel mollado, que non van servir para nada porque non están no acordo, -de feito non foron negociadas cos Países do Mercosur-, e porque, ademais, non hai mecanismos reais para facelas efectivas”, explicou a líder do BNG.
Pontón deixa claro que as “salvargadas” coas que se autoxustifica Rueda, “son un engano para calar ós gandeiros e gandeiras que están protestando, e en vez de vir a Bruxelas a defender o acordo Mercosur tiña que vir aquí a defender os produtores e produturas do noso País”.
Entre os contactos parlamentarios, a ponente do Grupo Verdes/ALE responsable de promover a imputación do acordo ante o Tribunal Europeo, Saskia Bricmont; Diana Riva, eurodeputada de ERC, Lynn Boylan e Kathleen Fuchion, eurodeputadas e responsables tamén da negociación do acordo polo Sinn Féin, así como Catarina Martíns, do Bloco de Esquerda de Portugal.
Na segunda xornada en Bruxelas, Pontón manterá unha reunión co vicepresidente da Comisión Raffaele Fitto, comisario responsable de Fondos e de Reformas, nun momento no que se está negociando o orzamento da UE (Marco Financeiro Plurianual) para o período 2028-2034, que inclúe drásticos recortes en fondos comunitarios que son fundamentais para Galiza.
