BNG denuncia a "pasividade" da Xunta ante as "usuras" das aseguradoras co taxi e a "desregularización" das VTC
O deputado do Bloque Nacionalista Galego, Paulo Ríos, criticou a xestión do Goberno do PP na Xunta en materia de transporte, denunciando a súa "pasividade" ante dous problemas clave que afectan o sector: a suba "abusiva" dos seguros do taxi e a "desregulación de facto" das empresas de VTC, que operan, segundo denunciou, "con incumprimentos sistemáticos das súas obrigas legais".
Ríos cualificou de "totalmente insuficiente" a partida de 1M€ implantada pola Xunta para paliar a suba dos seguros do taxi. "Son 240 euros por licenza, pan para hoxe e fame para mañá", lembrando que o incremento das pólizas supón "miles de euros" para os profesionais. O deputado nacionalista alertou especialmente da situación no rural, onde os taxistas "realizan unha función social esencial" que non está remunerada. Ante esta "irresponsabilidade" das aseguradoras, Ríos exixiu á Xunta unha resposta "moito máis contundente" para defender os dereitos dun sector que cualificou de "servizo público".
En paralelo, Ríos puxo o foco na situación das VTC, ás que acusou de competir "en desigualdade" co taxi. "Mentres ao taxi se lle exixe todo, vemos como moitas VTC incumpren a normativa, operando no ámbito urbano cando non lles corresponde ou utilizando pólizas de seguro máis baratas, como as de vehículo sen condutor, o que supón un claro agravio comparativo e un risco", denunciou.
Para o BNG, esta situación evidencia unha "dobre vara de medir" por parte da Xunta, que ten as competencias de inspección e sanción. "A Xunta non está a actuar con dilixencia. Mentres o taxi, que é servizo público, se afoga, permítese que un sector privado opere nunha especie de terra de ninguén, precarizando o servizo e desprazando ao sector público", afirmou Ríos.
"Non pode existir equilibrio entre un sector privado que tenta desprazar a un público mediante incumprimentos e competencia desleal. A Xunta de Galiza debe reforzar o sector público, colaborar na súa modernización, axilidade e accesibilidade para os usuarios e usuarias" salientou.
Finalmente, o deputado nacionalista reclamou á Xunta que "se pronuncie claramente" e abra un "debate profundo" no país sobre o modelo de transporte. "Queremos saber se a Xunta aposta pola liberalización total ou por defender o servizo público. E, sobre todo, queremos saber que vai facer para que as VTC cumpran escrupulosamente a lei e para promocionar e salvagardar os intereses do sector do taxi por riba dos intereses privados", concluíu.
