BNG denuncia que a Xunta "abandona" as súas competencias viarias en Cangas
Paulo Ríos acusa ao PP de "secuestrar" o desenvolvemento de Cangas e de usar as infraestruturas como "moeda de cambio" electoral
“O PP ten secuestrado o avance de Cangas por puro sectarismo político; actúan coa máxima de ‘canto peor, mellor’” sinalou
O deputado do Bloque Nacionalista Galego, Paulo Ríos, reclamou unha actuación urxente da Xunta para mellorar as infraestruturas viarias da súa titularidade no concello de Cangas. Ríos denunciou o “abandono sistemático” das estradas autonómicas no municipio e criticou a actitude do PP, que votou en contra da iniciativa.
O deputado nacionalista sinalou que “levamos moitos anos vendo como o goberno do PP na Xunta, ten secuestrado o avance de Cangas por unha cuestión de simple sectarismo político”. O deputado nacionalista reprochou ao Goberno galego que actúe “coa máxima de ‘canto peor, mellor’”, e que utilice as súas competencias como “moeda de cambio” en períodos electorais, prometendo actuacións que debería realizar de maneira inmediata.
Ríos fixo fincapé no estado “totalmente horrible” de vías como a avenida de Bueu, a avenida da Coruña, a Estrada da Magdalena, a avenida de Vigo ou a estrada de Aldán, e lembrou que a Xunta leva anos sen actuar nelas. “Son infraestruturas que requiren unha actuación integral, non parches cada dous ou tres meses que ten que facer o Concello con recursos propios”, afirmou.
O deputado do BNG tamén se referiu á intención do PP de presentar unha iniciativa no Concello de Cangas para que sexa o propio concello o que indique á Xunta onde debe actuar. “Sorprende que o PP queira pasarlle a responsabilidade ao Concello, cando a obriga de actuar é da Xunta. Non esperemos a que haxa eleccións municipais para escoitar promesas; exiximos que cumpran agora coas súas obrigas”, engadiu.
