BNG exixe actuacións urxentes ante as deficiencias no despregamento da fibra óptica en Lugo

Néstor Rego Candamil reclama unha intervención decidida do Ministerio para pór fin á discriminación que sofre o rural galego

O deputado do BNG sinala as eivas actuais do despregamento da fibra óptica e urxe, no concreto, a solucionar a falta de conexión das comarcas lucenses

O deputado do BNG no Congreso, Néstor Rego, denuncia as importantes carencias no despregamento da fibra óptica nas comarcas de Lugo, unha situación que está a deixar millares de fogares sen acceso a unha conexión de internet de calidade e agravando a fenda dixital, especialmente no rural. Ante esta situación, Rego exixe ao Goberno actuacións urxentes que permitan solucionar estas deficiencias e garantir a conexión da cidadanía.

Segundo os datos do Informe de Cobertura de Banda Larga de 2023, apenas 63,01% das vivendas de Lugo contan cunha conexión de polo menos 100 megas, situándose entre os territorios con peor acceso do Estado. En termos absolutos, estímase que 28.429 fogares dos 137.472 existentes non dispoñen de fibra óptica.

O deputado do BNG no Congreso, Néstor Rego Candamil, denuncia que “esta situación é absolutamente inaceptábel e evidencia o fracaso das políticas do Goberno en materia de conectividade no rural galego”. Ademais, subliña que “non só non se está a avanzar, senón que en moitos casos se está a retroceder, deixando sen servizo vivendas que antes contaban con ADSL tras a retirada do cobre”.

Néstor Rego alerta de casos especialmente graves como o do concello de Cervantes, onde apenas 11,03% dos fogares teñen acceso á fibra óptica. A esta situación súmanse outros concellos como Ribeira de Piquín, Folgoso do Courel, Negueira de Muñiz ou Muras, todos eles con porcentaxes inferiores a 20%. “Así non hai posibilidade de fixar poboación nin de desenvolver proxectos de vida dignos no rural” afirma.

A formación nacionalista tamén denuncia que os problemas de conectividade non se limitan ás zonas máis illadas, senón que afectan mesmo áreas próximas á cidade de Lugo, como o paseo fluvial ou a parroquia de Galegos, onde a veciñanza continúa sen acceso á fibra.

Outro dos aspectos que critica o BNG é a falta de resposta das compañías de telecomunicacións, ás que acusa de ofrecer unha atención neglixente ás persoas usuarias. “Hai unha absoluta indefensión da veciñanza, que non recibe solucións nin das empresas nin da Administración”, sinala o deputado.

Neste sentido, o BNG considera que o Goberno non pode seguir escudándose no Programa ÚNICO-Banda Larga, xa que o seu desenvolvemento no rural está a ser claramente insuficiente. “As empresas están a incumprir os compromisos adquiridos a pesar de recibir subvencións públicas, deixando fóra do despregamento as zonas menos rendíbeis” denuncia Rego.

Ante esta situación, o BNG exixe ao Goberno do Estado que recoñeza a gravidade dos datos de cobertura en Lugo e adopte medidas urxentes para revertelos, actuando tamén para garantir que ningún fogar quede sen acceso á fibra óptica, especialmente no rural.

“O Goberno debe supervisar e controlar o cumprimento das obrigas das empresas beneficiarias de fondos públicos, chegando a impulsar inspeccións e, se for o caso, sancionar as compañías que incumpran os compromisos adquiridos” demanda Rego. Por último, insta a desenvolver unha estratexia efectiva para garantir a igualdade no acceso a internet de calidade en todo o territorio galego.

“O acceso a internet de calidade non é un luxo, é un dereito básico e unha condición imprescindíbel para o desenvolvemento económico, social e demográfico do país” conclúe Néstor Rego, quen tamén reclama unha intervención decidida do Ministerio para pór fin á discriminación que sofre o rural galego.

https://www.bng.gal/articulo/novas/bng-exixe-actuacions-urxentes-deficiencias-despregamento-da-fibra-optica-lugo/20260429130548042701.html