Néstor Rego Candamil reclama ao Goberno a cobertura das prazas vacantes e a ampliación do cadro de persoal, así como eliminar a cita previa obrigatoria

O BNG defende garantir unha atención áxil, digna e de calidade en todas as oficinas da Seguranza Social na Galiza e atender especialmente a situación na Coruña

O Bloque Nacionalista Galego (BNG) denuncia a grave situación que atravesa a atención presencial nos Centros de Atención e Información da Seguridade Social (CAISS) na Galiza, cunha especial incidencia na Coruña, onde a cidadanía está a atopar serias dificultades para acceder a servizos básicos e o deputado do BNG no Congreso, Néstor Rego, reclama ao Goberno solucións inmediatas.

As dificultades para conseguir cita nos CAISS non son novas, mais a situación tense agravado até niveis inasumíbeis, impedindo que moitas persoas poidan recibir orientación ou realizar trámites esenciais relacionados coas pensións de xubilación, prestacións por coidado de menores ou adopción, baixas laborais, incapacidade permanente, o Ingreso Mínimo Vital (IMV), ou pensións de viuvez e orfandade, entre outras.

O BNG denuncia que, lonxe de garantir unha atención áxil e eficaz, as oficinas da Seguranza Social na Galiza están a ofrecer un servizo claramente insuficiente. Na Coruña, por exemplo, a situación é especialmente preocupante: “a atención sen cita previa continúa a verse obstaculizada e, no caso de tentar concertala, a cidadanía atópase coa inexistencia de citas dispoñíbeis nas oficinas de referencia”. No mes de abril, de facto, a única oficina con citas era a de Melide, mentres que para o mes de maio xa non hai dispoñibilidade en ningún centro.

“Esta realidade resulta intolerábel, especialmente tendo en conta que moitas das persoas afectadas son maiores, con dificultades de mobilidade ou sen acceso a medios de transporte propios” sinala Rego. O feito de que se vexan obrigadas a desprazarse máis de 70 quilómetros desde comarcas como Bergantiños ou a Costa da Morte até oficinas afastadas e mal comunicadas implica unha vulneración do dereito a unha atención pública digna.

Segundo sinalan organizacións sindicais e de consumidores, a principal causa desta situación é a falta de persoal, agravada polo incremento de expedientes e servizos. Os cadros de persoal actuais son claramente insuficientes para atender a demanda existente.

Neste contexto, o deputado do BNG no Congreso, Néstor Rego, reclama ao Goberno do Estado que recoñeza a gravidade da situación e actúe de inmediato. “Debe existir un reforzo inmediato do persoal en todas as oficinas, co obxectivo de garantir unha atención áxil, digna e de calidade, así como adoptar todas as medidas que sexan necesarias para rematar co colapso do servizo” incide Rego. Así mesmo, o deputado sinala a necesidade de que se elimine a obriga de cita previa para a atención presencial na Seguranza Social e no conxunto da Administración Xeral do Estado.

O BNG advirte de que a situación actual implica un deterioro grave dos servizos públicos e unha discriminación para a cidadanía galega, polo que exixe solucións inmediatas e estruturais que garantan o dereito a unha atención pública accesíbel e eficiente.

https://www.bng.gal/articulo/novas/bng-demanda-solucions-urxentes-colapso-atencion-presencial-dos-caiss-galiza/20260428104013042693.html