O deputado do BNG defendeu no Parlamento unha iniciativa para que a Xunta inicie negociacións coa UE co obxectivo de recuperar a titularidade 

O portavoz de Mobilidade e Transporte do BNG, Paulo Ríos, emprazou aos deputados e deputadas do PP a explicarlle á veciñanza do Morrazo por que xa non defenden que o transporte de ría volva ser de titularidade pública. “A que intereses serven?”, preguntoulle Ríos ás bancadas populares durante o debate dunha iniciativa nacionalista.

A proposición non de lei do BNG, contra a que votou o PP, instaba á Xunta a “dar os pasos necesarios”, negociando coa Unión Europa os cambios legais necesarios, para a recuperación da titularidade pública do transporte da ría co obxectivo, destacou Ríos, de blindar a súa continuidade e a atención ás necesidades das persoas usuarias.

O deputado nacionalista reprochou aos populares o seu cambio de postura e lembrou, neste sentido, que o PP impulsou desde a Xunta accións similares á debatida hoxe para, tal e como explicou, solicitar na Unión Europeo a reforma do marco legal, “na liña de superar o actual marco de libre competencia e de regulación para garantir un transporte de ría realmente público e fuxir da barra libre que supón a liberalización dun sector como este do transporte”.

É o mesmo que solicitaba, destacou, o Goberno presidido por Alberto Núñez Feijóo no ano 2015 e no 2016, que chegou a remitirlle a petición á UE posto que foi unha sentenza da Comisión Europea do 2006 a que obrigou á liberalización deste transporte, poñendo fin así á titularidade pública que establecía a regulación da Xunta do ano 1999.

“Por que cambiaron de idea e agora prefiren os cartos que saen dos petos de todos os galegos e galegas vaian cara unha empresa privada sen ningún tipo de garantía?”, preguntoulle a María Dolores Hermelo, encargada de defender a posición do PP, o deputado nacionalista, quen subliñou na súa exposición as irregularidades, sancións ou expedientes abertos nos últimos anos a algunhas navieiras por “fixar os prezos entre elas, repartirse o propio mercado ou directamente vender moito máis billetes dos que podían pola capacidade dos barcos”.

O deputado do BNG destacou, ademais, que o paso do tempo “desmontou” a sentenza da Comisión Europea en favor da liberalización do sector posto para evitar situacións de monopolio posto que, segundo o último rexistro de empresas prestadoras deste tipo de transporte, “hai ao redor duns 150 servizos e máis do 80% destes corresponden a dúas únicas empresas”.

https://www.bng.gal/articulo/novas/paulo-rios-empraza-pp-aclarar-que-xa-non-quere-que-transporte-da-ria-sexa-publico-que-intereses-serven/20260327141800042521.html