BNG critica que Rueda mobilice 900 M€ para a industria militar mentres escatima con só 157 M€ no plan de axudas pola guerra
Brais Ruanova considera “unha broma de mal gusto” que o PP só dispoña 6,2 millóns para apoiar aos fogares vulnerables, 17,5 veces menos que Euskadi
Reclama unha “rectificación” e convida aos populares a “copiar” o plan que presentou o Bloque, de 700 millóns, para protexer a familias e empresas
O portavoz de Economía e Industria do BNG, Brais Ruanova, denuncia as cantidades ridículas que o Goberno de Rueda destina ao plan de axudas para paliar os efectos da guerra en Oriente Próximo, tan só 157 millóns de euros que contrastan, critica, cos 900 millóns de euros que a Xunta quere mobilizar para a industria militar a partir dun investimento de 183 M, tal e como se recolle na Iniciativa Estratéxica en Seguridade, Defensa e Aeroespazo 2025-2030.
Ruanova considera “especialmente dramática” a contía que o Executivo do PP contempla no plan para axudar ás familias e ás clases sociais máis vulnerábeis, apenas 6,2 millóns de euros que contrapón os 105 (17 veces máis) que destina a protección social o Goberno de Euskadi dentro do seu paquete de medidas para paliar os efectos do conflito bélico.
“Parece unha broma de mal gusto”, asegura o deputado nacionalista, sinalando que a escasa dotación orzamentaria para protección social no plan da Xunta aínda adquire maior gravidade se se compara cos cinco millóns de euros que o PP pretende inxectar na promoción turística de Galiza como “destino de tranquilidade” a través dese paquete de axudas pola guerra.
O deputado de Economía e Industria do BNG vén de facer unha análise do plan galego, que contrapón aos aprobados, por exemplo, en Euskadi (1.047M€) e Cataluña (400). Análise na que se pon de manifesto, así mesmo, a escasa contía do plan do PP no apoio ás empresas, 62 millóns en préstamos. Fronte a eses 62 M€ de Galiza, Euskadi destina 450 millóns, 7,2 veces máis.
No caso de sectores “tan estratéxicos” na economía galega como o mar e o agro o Goberno de Rueda destina apenas 45 M€, advirte Ruanova, que critica, ademais, a falta de axudas directas ou que, no caso do sector do mar, as subvencións da Xunta sexan exclusivamente para modernización de infraestruturas portuarias, lonxas e cadeas de frío e para proxectos que incrementen o valor engadido do produto.
O mesmo sucede, engade, co sector agrogandeiro, con axudas para “agricultura de precisión” ou “compra de maquinaria” cando un dos grandes problemas que afrontan agora estes sectores é a factura dos combustíbeis e derivados.
“Esixímoslle á Xunta que rectifique e cambie de rumbo”, apunta Rúanova Vilas-Boas, que empraza ao Goberno de Rueda a “copiar” as propostas do plan elaborado polo goberno alternativo do BNG para afrontar as consecuencias da guerra.
Un plan que, detalla, propón mobilizar “como mínimo” 700 millóns de euros e inclúe, entre outras medidas, a posta en marcha dun “escudo social” para “protexer ás persoas” fronte á subida de prezos derivada da escalada bélica. O escudo social do Bloque contempla medidas como duplicar o complemento autonómico para as pensións non contributivas, un bono social de transporte de 30 euros/mes, reforzo extraordinario das prestacións de emerxencia social nos servizos municipais ou garantir a protección fronte aos desafiuzamentos sen alternativa habitacional e limitar, en coordinación co Goberno do Estado, o incremento en alugueiros e hipotecas.
Parches e máis débeda para o futuro
Á protección das empresas con préstamos, o plan do BNG suma liñas de axudas e subvencións directas a fondo perdido -sobre todo para aqueles sectores máis expostos á subida dos combustíbeis-, o levantamento de peaxes das autoestradas da Xunta ou un plan de diversificación e resiliencia produtiva. Ademais, inclúense medidas encamiñadas á autonomía enerxética ou o control de prezos, como extremar o papel da Comisión Galega da Competencia para investigar e sancionar prácticas especulativas ou abusivas.
Colaborar cos concellos e reforzar o seu financiamento para garantir prestación de servizos públicos básicos é outra das propostas que destaca Brais Ruanova, que define o plan do BNG como un “escudo social galego integral” fronte aos “parches e a débeda para o futuro” do PP. “Ante as consecuencias derivadas da guerra, Galiza non pode quedar atrás”, conclúe.
