Ana Pontón: “Non á guerra, imperialismo nunca máis”

Pídelle ao PP non repetir a foto criminal dos Azores e empraza a Rueda a poñerse do lado da Paz, do lado correcto da historia

A portavoz nacional do BNG, Ana Pontón, entoou o “non á guerra, imperialismo nunca máis” ao inicio do Pleno deste martes, pediulle ao PP non repetir a foto criminal dos Azores e emprazou a Rueda a poñerse do lado da Paz, do lado correcto da historia.

“Deixe de renderlle pleitesía aos EEUU e a Trump, denuncie a violación do dereito internacional e diga non a esta guerra criminal e inxusta”, demandoulle.

Lembrando as palabras de Eduardo Galeano “as guerras menten, ningunha guerra ten a honestidade de confesar que matan para roubar (..)”, esixiulle ao PP que “non siga coa mentira, porque sabemos que as bombas que lanzan en Irán, moitas delas sobre os corpos de nenas inocentes, non buscan a paz e o progreso, só buscan roubar o petróleo e controlar Oriente Medio”. “Señoras do PP, non repitan a foto dos Azores”, expresou, reclamándolle a un Rueda ausente que “rectifique” e que se poña “do lado correcto da historia”.

Pontón asegurou que o BNG e a maioría de galegos e galegas, antes e agora, “dixemos e seguimos dicindo non á guerra imperialista, criminal e inxusta promovida polos Estados Unidos, Israel e os seus aliados. Non a unha guerra que está incendiando Oriente Medio e que fai estremecer o mundo. Unha guerra que, ademais de morte, destrución e sufrimento, está provocando gravísimas consecuencias no comercio, na actividade económica e no custo da vida.”

Recalcou neste punto que a cidadanía galega non ten que pagar a guerra dun “xenocida como Netanyahu e dun criminal como Trump”, e por iso lle pediu ao Partido Popular e a Rueda que, por unha vez, “se poña diante dos dereitos humanos e do interese de Galiza” , que “deixe de renderlle pleitesía aos EEUU e a Trump”, que denuncie a violación do dereito internacional e que diga “non a esta guerra criminal e inxusta”.

Tras defender o dereito da soberanía dos pobos e a resolución pacífica dos conflitos, nunha aposta “sempre, sempre, pola paz”, lamentou que o PP perdese no Pleno a oportunidade de “poñerse do lado do que pensan a maioría dos galegos e das galegas, que non queren asistir impasibles ante outra guerra criminal e inxusta”.

“Tanto lles custa despregarse un pouco das directrices do PP de Madrid e defender o sentido común, a dignidade humana, dicir “non á guerra” e despegarse das políticas imperialistas de Trump?, interpelou dirixíndose ás bancadas populares.

Pontón fixo estas declaracións ao inicio do Pleno, despois de que os deputados e deputadas do BNG amosasen desde os seus escanos uns carteis con lemas en contra da guerra.

https://www.bng.gal/articulo/novas/ana-ponton-non-guerra-imperialismo-nunca-mais/20260310122217042386.html