BNG denuncia o abandono institucional no Hospital Psiquiátrico de Conxo e esixe ao PP medidas urxentes

A deputada Iria Carreira denuncia o desleixo con pacientes especialmente vulnerables que requirirían unha maior protección por parte da Xunta

A deputada do BNG, Iria Carreira, denunciou na Comisión de Sanidade o abandono institucional do Hospital Psiquiátrico de Conxo e reclamoulle ao PP medidas urxentes para resolver as graves deficiencias estruturais, asistenciais e de dereitos humanos que padecen as persoas ingresadas no centro sanitario compostelá, destacando o desleixo cos pacientes especialmente vulnerables que requirirían unha maior protección por parte da Xunta.

“Os pacientes de Conxo non son pacientes de segunda que a Administración está obrigada a protexer e que, con reiteración, está a vulnerar”, acusou Carreira despois de expor os feitos concretos e recentes que ilustran o abandono do centro. É o caso da inundación que o pasado 18 de febreiro sufriu unha unidade de hospitalización tras acumularse auga no teito, que acabou saíndo mesmo polo cadro eléctrico, poñendo en risco de electrocución a pacientes e traballadoras. “A xerencia tiña constancia de goteiras previas que xa tiñan provocado caídas de pacientes, pero non actuou”, afeou.

Tamén deu conta da presenza, máis recentemente, de piollos corporais en varios pacientes sen que se adoptasen medidas mínimas de control. “A roupa acumulouse en bolsas sen lavar e sen que se informase ao persoal de lavandería”, apuntou. Outras incidencias documentadas inclúen portas de seguridade atadas con vendas ou xanelas mal instaladas nas que o vidro irrompible quedou cara a fóra.

Carreira explicou que o propio Mecanismo de Prevención da Tortura (MNP) cualificou o centro como un espazo en “estado de deterioro significativo”, que “ofrece condicións insalubres”, onde mesmo non se prende a calefacción o tempo necesario, detectando humidades xeralizadas, xanelas deterioradas, un número elevado de suxeicións mecánicas sen protocolo axeitado, así como a ausencia de calquera protocolo de prevención de violencia de xénero ou de suicidios.

Segundo indicou, tralas eleccións de 2024, os tímidos avances que se tiñan iniciado en resposta ás visitas do MNP, quedaron paralizadas: “As obras están sen rematar, os pacientes continúan soportando situacións indignas, non hai unha xefatura nese hospital, non hai plan de mellora, mingua o persoal e paralízanse as altas hospitalarias pola falta de opcións comunitarias por falta de opción habitacional, porque non hai prazas en residencias ou porque non teñen acceso aos recursos económicos que lles corresponden”, denunciou.

É por iso que a deputada nacionalista formulou ata once preguntas na Comisión 5ª, entre elas, a de se o Goberno galego é consciente da situación do hospital, os motivos polos cales a xerencia non actuou antes da inundación e cales son as medidas adoptadas. Tamén quixo saber por que non se realizaron as obras de mellora demandadas desde hai décadas ou se existe discriminación entre as pacientes de Conxo e as doutros centros da mesma área sanitaria, por exemplo á hora de escoller a dieta basal. Tamén preguntou polas razóns polas que a Xunta de Rueda deso as recomendacións do MNP.

En canto ás medidas, interrogou tamén ao PP sobre os plans de desinstitucionalización e os recursos comunitarios dispoñibles para garantir altas en condicións dignas, tamén polas medidas para garantir a atención non discriminatoria e para combater as violencias machistas. Por último, Carreira cuestionou sobre o número e duración das contencións mecánicas no último ano.

Na súa réplica recriminoulle ao director xeral de Asistencia Sanitaria do Sergas, Alfredo José Silva, que viñese á Comisión anunciar que en febreiro de 2026 se convocou o posto de xefatura de sección para este hospital, o que significa que “durante todo este tempo non houbo unha cabeza ao fronte deste centro sanitario” e preguntoulle se, en lugar de estar falando do hospital psiquiátrico, estivésemos a falar do Provincial ou do Clínico, isto se produciría.

“Acaso non hai un abandono deste centro no momento en que non interesa que haxa unha xefatura de sección cando vostede recoñeceu que “é un centro singular”? expresou. Criticou ademais que “o que se está vendendo é o mínimo imprescindible” despois de que o responsable da Xunta tamén dixese que se “sistematizaron os estadillos”, unhas reunións que todos os hospitais fan de xeito regular antes de comezar a súa actividade diaria.

Tamén lle recriminou que o Sergas non lle remita ao BNG os datos referidos ao uso das contencións mecánica. “Vostede pode asegurar que as contencións mecánicas se manteñen durante un tempo mínimo imprescindible?, porque, que o MNP lle recoñeza o traballo que están facendo non é algo tan bo tendo en conta que o que había antes era nulo”, rematou.

https://www.bng.gal/articulo/novas/bng-denuncia-abandono-institucional-hospital-psiquiatrico-conxo-esixe-ao-pp-medidas-urxentes/20260326204900042513.html