BNG exixe un pronunciamento urxente ante a "violenta e racista" actuación do ICE contra galegos nos EEUU
Iria Taibo denuncia o "silencio cómplice" do goberno do PP mentres máis de 25.000 residentes galegos están en situación de vulnerabilidade ante as deportacións masivas de Trump
A deputada do Bloque Nacionalista Galego, Iria Taibo, exixir ao goberno de Rueda que concrete cal é a súa postura ante a actuación do Servizo de Control de Inmigración e Aduanas (ICE) dos Estados Unidos e que informe sobre as medidas previstas para protexer os máis de 25.000 galegos e galegas residentes no país norteamericano.
Taibo denunciou a "deriva autoritaria e racista" do ICE, especialmente desde o inicio do segundo mandato de Donald Trump, converténdose "no maior órgano policial da historia de EEUU" cunhas actuacións que cualificou de "paramilitares" e "arbitrarias". A nacionalista alertou de que os axentes "non precisan unha orde xudicial para deter persoas" e poden facelo "só por sospeitar que se atopan ilegalmente no país", documentándose ademais "numerosos incidentes de uso excesivo da forza" e máis de 30 mortes de migrantes baixo custodia do ICE só en 2025, incluídas crianzas.
A deputada reprochou ao goberno galego a súa "pasividade" e "medo a pronunciarse en defensa dos dereitos dos galegos". Lembrou que o secretario xeral da Emigración compareceu a semana pasada no Parlamento "sen facer nin unha soa referencia á situación nos EEUU, a pesar das preguntas do meu compañeiro Daniel Castro". Mentres tanto, criticou, "o departamento de emigración dedícase á publicidade institucional e á propaganda", e o propio presidente Rueda "viaxará a Suíza dentro duns días" sen dar mostras de interese pola diáspora en América.
Para o BNG, "é imposíbel desligar a violenta actuación do ICE da política exterior dos Estados Unidos, asasina e imperialista", que cualificou de "apoio á actuación criminal e xenocida do goberno sionista de Israel en Gaza" e ao que considera "o inicio dunha guerra ilegal en Irán". Neste sentido, Taibo vinculou a desprotección dos migrantes coa "indefensión" xerada por unha política internacional baseada en "argumentos falsos" e na busca de "control xeoestratéxico".
"Os EEUU senten que poden usar calquera pretexto para atacar calquera territorio en defensa dos seus intereses e dos seus amigos sionistas, do mesmo xeito que senten que poden usar calquera pretexto para deter, expulsar e mesmo asasinar persoas polo seu perfil racial ou pola lingua que falan", sentenciou a deputada.
A formación nacionalista insta a Xunta a abandonar o que considera un "silencio cómplice" e a poñer en marcha actuacións concretas de acompañamento e asesoramento para os galegos residentes nos EEUU ante o que cualifican como unha "política racista e clasista" que deixa as persoas migrantes nunha situación de "máxima vulnerabilidade".
