BNG reclama a Transportes actuar para, en colaboración co INORDE, pór a disposición as vivendas da estación da Vilavella na Mezquita

Néstor Rego avanza o rexistro de iniciativas nas Cortes do Estado para que o Goberno cumpra e culmine o proxecto previsto nas instalacións cedidas ao INORDE

Rafael Pérez sinala a necesidade de que as administracións estatal e provincial atendan as necesidades habitacionais da Mezquita

O deputado do BNG no Congreso, Néstor Rego, acompañado polo alcalde da Mezquita, Rafael Pérez, a concelleira, Cristina Clavería, o deputado do BNG no Parlamento de Galiza, Secundino Fernández, e a responsábel comarcal do BNG, Samanta Barreira, avanza o rexistro de iniciativas nas Cortes do Estado co obxectivo de que o Goberno do Estado, e no concreto ADIF, culminen o proxecto de vivendas previsto para as instalacións da antiga estación da Vilavella e evitar o progresivo deterioro das mesmas.

A organización nacionalista lembra que as instalacións foron cedidas ao INORDE co compromiso de desenvolver nelas un proxecto que permitise recuperar e pór en uso os edificios existentes. Pasa o tempo, sinala o BNG, e a non actuación da administración está a provocar un deterioro constante das dependencias, incluídas as vivendas e o albergue.

O alcalde da Mezquita sinala a necesidade de que as administracións competentes, tanto a Deputación de Ourense a través do INORDE como o Goberno do Estado co Ministerio de Transportes, escoiten as necesidades habitacionais do municipio. “Levamos anos agardando actuacións nestas instalacións que deberían destinarse a dar resposta a necesidades reais da veciñanza” demanda Rafael Pérez, que sinala esta medida como unha forma de favorecer tamén a fixación de poboación nun concello do rural.

Pola súa parte, Néstor Rego subliña que o Ministerio de Transporte, en colaboración co INORDE, debe actuar o antes posíbel para pór en uso as vivendas existentes na estación da Vilavella, na Mezquita, así como o albergue que se atopa en condicións para ser empregado

“Non é de recibo que, coas necesidades de vivenda existentes, por cuestións burocráticas haxa vivendas baleiras. Todas as vivendas que dependen do Estado -sexan de ADIF, da SAREB, do propio Ministerio de Vivenda- deben ser transferidas á Administración Galega ou aos concellos galegos que queiran xestionalas para poder poñelas en uso e intentar resolver os problemas de vivenda” afirma o deputado do BNG.

Ante esta situación, Rego avanza o rexistro de iniciativas nas Cortes do Estado para que o Goberno explique cal e a situación actual das instalacións da estación de Vilavella, os compromisos adquiridos coa cesión ao INORDE e o calendario previsto para executar as actuacións necesarias que permitan rehabilitar e pór en uso as vivendas e o albergue.

A recuperación destas instalacións, segundo explica a organización nacionalista, implicaría non só evitar o deterioro dun patrimonio público xa existente, senón contribuír a ampliar a oferta de vivenda nun concello do rural que precisa medidas efectivas para combater o despoboamento, facilitar novas oportunidades para vivir e desenvolver novos proxectos de vida.

https://www.bng.gal/articulo/novas/bng-reclama-transportes-actuar-colaboracion-co-inorde-disposicion-vivendas-da-estacion-da-vilavella-mezquita/20260312134450042407.html