BNG urxe o Goberno a acometer un Plan Integral de Rehabilitación e Reforma da N-640
O Bloque Nacionalista Galego vén de rexistrar novas iniciativas nas Cortes do Estado para reclamar ao Goberno que actúe e acometa un Plan Integral de Rehabilitación e Reforma da N-640. A senadora do BNG, Carme da Silva, urxe o executivo a acometer a reparación do firme e a mellora e adaptación da estrada no tramos urbanos para que teñan un perfil de travesías urbanas, con especial atención en termos municipais como Caldas, Cuntis e A Estrada.
En numerosas ocasións, a formación nacionalista trasladou ao executivo do Estado a necesidade de levar a cabo un Plan Integral de Rehabilitación e Reforma da N-640, unha infraestrutura chave e estratéxica para as comarcas do Deza, Tabeirós-Terra de Montes e Caldas. “É hora de pasar das palabras aos feitos porque esta estrada, que presenta un importante volume de tráfico, precisa máis que nunca dunha actuación urxente e importante” subliña a senadora nacionalista.
“As continuas choivas dos últimos meses acrecentan a necesidade de iniciar as obras de reparación urxente e que o Ministerio atenda as demandas da veciñanza e dos colectivos sociais co obxectivo de suprimir as zonas críticas da N-640 adoptando medidas que melloren a seguranza viaria” enfatiza Carme da Silva.
Á marxe das melloras que precisa esta vía, continúa a senadora do BNG, tamén é preciso actuar ao seu paso pola Estrada, Cuntis ou Caldas. “A estrada pasando por estes núcleos de poboación precisa ser adaptado ao perfil de travesías urbanas” engade.
No caso da Estrada, alén de adaptar os tramos urbanos e mellorar o firme, débense implantar elementos de seguranza viaria e calmado de tráfico e redución de velocidade. “Cabe recordar que neste punto se teñen producido distintos accidentes e atropelos a peóns” afirma a senadora do BNG.
O termo municipal de Cuntis presenta unha serie de tramos, tanto no núcleo urbano como nas áreas rurais, que contabilizan un elevado número de accidentes. No concreto, son precisas actuacións no cruzamento de Portela cara Santiago, o cruzamento de San Ildefonso e a Igrexa, Campo e Lornés, así como á altura da escola infantil en Portodegómez e diante da piscina municipal.
“En Caldas o principal problema é o mal estado do firme e, a pesar de que se leva anunciando desde 2024 que se procederá a súa reparación a través do programa EVAPAVES, non se coñece actuación algunha ao respecto” recrimina a senadora do BNG.
