BNG urxe solución inmediata e práctica para evitar os cortes recorrentes da autovía Pontevedra-Marín por inundacións

A senadora do BNG, Carme da Silva, vén de rexistrar iniciativas de urxencia para reclamar ao Goberno do Estado a adopción de medidas efectivas e realistas para poñer fin aos constantes cortes da autovía PO-11, que comunica Pontevedra e Marín, unha infraestrutura clave que sofre peches habituais cada vez que coinciden choivas intensas e a pleamar.

Esta situación, lonxe de ser puntual, explica a senadora nacionalista, agravouse de maneira evidente coa concatenación de borrascas e temporais que se veñen sucedendo desde o mes de xaneiro e, con especial intensidade, durante este mes de febreiro, no que os cortes da vía están a producirse practicamente a diario.

Como consecuencia das inundacións que chegan a anegar varios carrís da autovía, a Garda Civil de Tráfico vese obrigada a desviar o tráfico pola antiga estrada PO-546 e pola variante de Marín, VG-4.4, xerando importantes problemas de mobilidade e seguranza viaria, tanto nos accesos ao centro urbano de Marín como na zona de Concepción Arenal e na entrada ao barrio pontevedrés dos Praceres.

A senadora do BNG, Carme da Silva, lembra que se trata dun problema “perfectamente coñecido polo Ministerio desde hai anos” e critica a inacción do Goberno do Estado: “Non estamos diante dun feito excepcional, senón dun problema recorrente e reiterado no tempo ante o que o Ministerio de Transportes segue sen ofrecer ningunha solución práctica” afirma.

Desde o Concello de Pontevedra, recorda a senadora do BNG, levan tempo reclamando unha solución estrutural que permita resolver de maneira definitiva estas inundacións. Precisamente a raíz desta situación, o Concello de Pontevedra vén de trasladar unha queixa formal ao Ministerio de Transportes pola “manifesta pasividade” do Goberno do Estado á hora de afrontar os continuos peches da PO-11, unha circunstancia que está a causar graves problemas de mobilidade en Pontevedra, Marín, na parroquia de Lourizán e tamén no porto, onde os transportistas teñen serias dificultades para acceder ás instalacións portuarias.

Para Carme da Silva, resulta insuficiente que a única resposta do Ministerio sexa incluír este treito nun estudo de carácter estatal da Dirección Xeral de Estradas sobre riscos de inundación. “Os estudos non resolven o día a día da xente. O que se precisan son actuacións concretas e inmediatas que eviten que a autovía se converta nun punto negro cada vez que chove” subliña da Silva.

Neste sentido, o BNG demanda ao Goberno do Estado recoñecer a gravidade da situación e a súa responsabilidade nos continuos cortes da PO-11; asumir que se trata dun problema coñecido desde hai anos sen resolver; que teña en conta o impacto directo que estes peches teñen na mobilidade e na seguranza viaria de Pontevedra, Marín e Lourizán; e que actúe con urxencia ante o empeoramento derivado das sucesivas borrascas.

Así mesmo, o Bloque exixe que se fagan públicas as conclusións do estudo estatal sobre riscos de inundacións no caso concreto desta autovía e, sobre todo, que se adopten de inmediato medidas efectivas para acabar cos peches recorrentes.

“A veciñanza non pode seguir pagando coa súa seguridade e coa súa mobilidade a inacción do Goberno do Estado. É hora de pasar dos diagnósticos ás solucións” finda a senadora do BNG, Carme da Silva.

https://www.bng.gal/articulo/novas/bng-urxe-solucion-inmediata-practica-evitar-cortes-recorrentes-da-autovia-pontevedra-marin-inundacions/20260213083258042235.html