Unha delegación do BNG mantén unha reunión con representantes do Comité de Empresa do Grupo Losán co obxectivo de analizar a grave situación que atravesa a compañía e coordinar actuación en defensa do emprego e da actividade industrial nas plantas de Curtis e Vilasantar. O deputado do BNG no Congreso, Néstor Rego, traslada o apoio dos nacionalistas aos traballadores e traballadoras e avanza que levará a debate e votación unha iniciativa reclamando a intervención do Goberno do Estado para garantir a continuidade da actividade industrial e os postos de traballo.

Ademais da presenza de Néstor Rego, pola parte do BNG tamén participa na reunión a deputada nacionalista no Parlamento de Galiza e responsábel comarcal, Iria Carreira, e os voceiros da formación nacionalista en Curtis e Vilasantar, Lucas Quintas e Álvaro García, así como concelleiros e concelleiras da organización e militantes da comarca.

No encontro, o BNG traslada ao persoal o seu firme compromiso en traballar para que se manteña a actividade industrial e para a continuidade dos postos de traballo. Neste sentido, o deputado nacionalista avanza que levará a debate e votación no Congreso unha iniciativa específica sobre a situación do Grupo Losán, coa finalidade de exixir ao Goberno do Estado unha implicación real e efectiva.

Néstor Rego sinala que “non é admisíbel que, despois de recibir 35 millóns de euros da SEPI a través do fondo de solvencia post-covid, ademais doutras axudas públicas e avais, a empresa estea nesta situación límite, con preto de 200 traballadores e traballadoras acumulando meses sen cobrar”. O deputado nacionalista subliña que o Congreso debe abordar esta cuestión “con transparencia e responsabilidade, para aclarar que fallou e para asegurar que os recursos públicos serven para defender o emprego e non para facilitar recortes ou despedimentos”.

O BNG considera imprescindíbel que a SEPI asuma un papel activo na supervisión dun verdadeiro plan de viabilidade, garantindo o mantemento da actividade produtiva e valorando, de ser necesario, a súa participación no capital da empresa para protexer o interese público. “Non pode haber nin pasividade institucional nin desmantelamento silencioso mentres están en xogo centos de empregos nun sector estratéxico para a economía da comarca e do conxunto da Galiza” afirma Rego.

Pola súa parte, a deputada do BNG no Parlamento de Galiza, Iria Carreira, mostra o apoio do BNG ao conxunto dos traballadoras e traballadores do Grupo Losán e comprométese a manter unha comunicación fluída co comité para facer seguimento das actuacións políticas e institucionais que se desenvolvan nas vindeiras semanas.

“O que está en xogo é o futuro de centos de familias e dun proxecto industrial clave para o tecido produtivo galego. O Goberno do Estado ten que actuar con responsabilidade e en coherencia cos fondos públicos investidos. Mais tamén se deben estabelecer as canles de comunicación coa empresa, o comité e a Xunta para garantir un plan de viabilidade para manter a actividade industrial e os postos de traballo” afirma Iria Carreira.

https://www.bng.gal/articulo/novas/bng-defendera-congreso-mantemento-do-emprego-viabilidade-do-grupo-losan/20260213141039042239.html