Ana Pontón: “Lugo ten un goberno que funciona e a cidade e a veciñanza merece respecto"

Ante a sospeita de que o PP tente comprar o voto dunha tránsfuga a cambio dun cargo público: “Sería un escándalo democrático e unha ilegalidade pola que habería que responder ante a Xustiza”

Critica a Rueda que desprece o mandato da veciñanza, á que lle di que “o seu voto non vale nada” e que pode ser cambiado con pactos escuros de despacho

A portavoz nacional, Ana Pontón, afirmou que Lugo e a súa veciñanza merecen respecto e non ser utilizados polo PP e Alfonso Rueda como “campo de xogo das súas estratexias políticas” cunha moción de censura “indecente e sen escrúpulos” a un goberno municipal que funciona e do que puxo en valor o papel destacado e o “extraordinario traballo” do tenente de alcalde, Rubén Arroxo, e do conxunto de concelleiros e concelleiras do BNG, demostrando que hai outra forma de facer política e que “teñen un proxecto de cidade que pon as persoas no centro”.

Pontón recriminou ao PP e a Rueda unha posible moción de censura que cualificou de “vergoña democrática” e que non responde aos intereses da cidade, senón aos “seus intereses partidarios”. “Non lles importan a xente de Lugo e están dispostos a todo con tal de facerse co poder, porque o que hai detrás desta moción de censura non é un proxecto de cidade, senón pactos escuros”, remarcou para considerar a continuación a moción como “unha traizón ao que votaron os veciños e veciñas”.

“O único interese que ten o PP é facerse co poder polo poder”, sintetizou Pontón, quen, nunha comparecencia en Lugo xunto a Arroxo, advertiu que “non todo vale en política”. “O que nos están demostrando Rueda e o Partido Popular é que non teñen escrúpulos, que non lles importa cabalgar esta moción de censura sobre a morte de varias persoas, nin tampouco utilizar os recursos públicos para comprar vontades”, advertiu.

Neste sentido, considerou gravísima a sospeita de que se está creando unha praza a dedo para unha tránsfuga do Partido Socialista para comprar unha moción de censura e adulterar o resultado das urnas, unha operación coa que, reprobou, Rueda e o PP están enviando aos veciños e veciñas de Lugo a mensaxe de que “o seu voto non vale nada” e que “a vontade que expresaron nas urnas se pode torcer con pactos escuros nos despachos”.

A líder nacionalista avanzou que o BNG vai facer seguimento desa praza porque se isto se confirma, estaríase ante “un escándalo democrático de envergadura como non se recorda na cidade” e, ademais, recalcou, “unha ilegalidade”. “Polo tanto, os responsables desa ilegalidade, empezando polo señor Rueda, que é o máximo responsable da Xunta, terán que render contas ante a xustiza, porque non todo vale en política”, advertiu.

Pontón incidiu en que o titular do Executivo “non pode pasar por diante da dignidade dos veciños e veciñas de Lugo”, nin por diante do que votaron nas urnas “xa que o PP non ten unha maioría para gobernar a cidade” e sinalou á indignación que se sente na cidade porque “ninguén entende que esta moción de censura poda presentarse”, entre outras razóns, porque se sabe que “detrás só están os pactos escuros do Partido Popular, entender a política como un xogo de tronos e amosar a súa peor cara”. “Porque cando se lle perde o respecto á cidadanía, pérdeselle o respecto á democracia e sen democracia non pode haber avance”, sintetizou.

A portavoz nacional recordou que a veciñanza de Lugo decidiu hai tres anos que goberno tería e que dentro dun ano podería apostar por outro goberno pero, sen embargo, “o que está dicindo o Partido Popular é que o seu voto non vale nada”, unha “indignidade, recalcou, “que a cidade non se merece”.

“Pedímoslle ao señor Rueda que rectifique por que non todo vale, porque Lugo non é o campo de xogo das súas estratexias de curto alcance e, sobre todo, porque Lugo merece máis”, afondou logo de indicar que o BNG vai seguir traballando pola cidade.

Por último, Pontón amosou o seu convencemento de que esta moción “indecente e sen escrúpulos” que demostra “até que punto o PP está nunha degradación política terrible”, vaille pasar factura non só ao PP de Lugo, senón tamén a un Rueda que demostra “como entende a política e a súa falta de respecto aos veciños e veciñas”.

Unha veciñanza, alegou, que ten dereito a “elixir nas urnas ao seu alcalde ou á súa alcaldesa” e que non merece “esta manobra política que é indignante e que demostra até que punto o Partido Popular non ten escrúpulos e está instalado na indecencia política”, concluíu.

https://www.bng.gal/articulo/novas/ana-ponton-lugo-ten-goberno-que-funciona-cidade-vecinanza-merece-respecto/20260422133020042651.html