BNG constata no informe de Contas o “deterioro sistemático e programado” da sanidade pública a mans do PP

Iria Carreira urxe a Rueda un xiro na política sanitaria, máis investimento e que deixe de usar os cartos das e dos galegos para favorecer a privada 

A portavoz de Sanidade Hospitalaria do BNG no Parlamento, Iria Carreira, considera que o último informe publicado polo Consello de Contas sobre o funcionamento da Atención Primaria en Galiza é unha confirmación máis do “deterioro sistemático e programado” da sanidade pública a mans do Goberno do PP e das súas políticas dos últimos dezasete anos.

“Contas ratifica o que vimos denunciando no BNG desde hai anos”, subliña a deputada nacionalista, que apunta aos efectos que ten na atención á saúde dos galegos e as galegas o “baixo investimento” que o órgano fiscalizador constata na Atención Primaria, a porta de entrada dos e das doentes ao sistema público de sanidade.

O informe do Consello de Contas sitúa a Galiza, destaca, “á cola” do Estado en investimento en Atención Primaria, “por debaixo da media estatal e moi afastado das recomendacións da Organización Mundial da Saúde”, salienta Carreira, que sinala a falta de persoal ou as cada vez máis elevadas listas de espera nos centros de saúde como algunhas das consecuencias que traen consigo os recortes do Goberno do PP.

“A falta de investimento tradúcese en que un terzo das prazas existentes na Atención Primaria estean vacantes, en que o 40 % dos concellos galegos non teñan un servizo de pediatría ou en que se estean incrementando de xeito alarmante e preocupante as listas de espera para poder ter unha cita coa túa médica de cabeceira”, recalca.

É por iso que o BNG esíxelle máis unha vez o Goberno de Rueda que atenda ás recomendacións que fai Contas, “que dea marcha atrás, que rectifique e que cambie o seu modelo sanitario para facer unha aposta real pola sanidade pública”, asegura Carreira, que lembra que a formación nacionalista leva tempo denunciando que o PP recortou durante os seus anos na Xunta 1.600 millóns de euros na atención Primaria.

Entre outras cuestións, Carreira urxe ao Goberno do PP a aumentar os recursos que se destinan á Atención Primaria ata chegar ao 25 % do orzamento sanitario, tal e como recomenda a Organización Mundial da Saúde e tal e como vén reclamando o BNG desde hai anos. Na mesma liña, demanda ao Executivo de Rueda a posta en marcha dun plan de ordenación de recursos humanos, “con persoal suficiente para dar resposta ás necesidades da poboación”, e que “deixe, dunha vez por todas, de utilizar os cartos públicos, o diñeiro de todos os galegos e galegas, para nutrir e engordar o negocio da sanidade privada”.

https://www.bng.gal/articulo/novas/bng-constata-informe-contas-deterioro-sistematico-programado-da-sanidade-publica-mans-do-pp/20260423205117042666.html