BNG e a Fundación Galiza Sempre organizan unha xornada de análise e conmemoración do 50 aniversario das Bases Constitucionais da Nación Galega

O documento que defendía a soberanía do pobo galego e o dereito a autodeterminación foi aprobado o 7 de abril de 1976

A xornada celebrarase o sábado 18 de abril na Escola Técnica Superior de Enxeñaría da USC

O BNG e a Fundación Galiza Sempre conmemorarán o 50 aniversario das Bases Constitucionais da Nación Galega cunha xornada que terá lugar o sábado 18 de abril en Compostela, cidade na que foron aprobadas polo Consello de Forzas Políticas de Galiza o 7 de abril de 1976.

A responsábel de Organización do BNG, Lucía López e o presidente da Fundación Galiza Sempre, Rubén Cela, presentaron o acto de conmemoración do 50 aniversario da aprobación das Bases Constitucionais da Nación Galega como o recoñecemento a "un documento político de relevancia histórica que defendía que a soberanía residía no pobo galego e propuña a participación da nación galega nun pacto federal coa autodeterminación como principio fundamental".

O documento político e económico foi promovido polo Consello de Forzas Políticas Galegas -composto pola Unión do Pobo Galego, o Partido Galego Social-Demócrata e Partido Socialista Galego- que aprobaba en Compostela o 7 de abril de 1976 as Bases Constitucionais para a Nación Galega (co título completo de Bases Constitucionais para a participación da Nación Galega nun Pacto Federal e de Goberno Provisorio Galego) e o Proxecto de Medidas Económicas para un Programa de Goberno Provisorio Galego.

As Bases afirmaban que o pobo galego é a quen lle corresponde a soberanía política e defendían o principio de autodeterminación nacional nun documento en que se establecían tamén as condicións mínimas para a participación de Galiza no Pacto Federal Español. No texto recoñecíase un ambicioso conxunto e competencias nacionais galegas como son a autoorganización política e o autogoberno, o réxime xurídico da Administración galega e das liberdades públicas, o réxime electoral, a determinación dos nacionais galegos, a seguridade para manter a orde pública cunha Garda Nacional e un servizo de Policía Nacional, a política económica e fiscal e a planificación da economía, o dereito civil, mercantil e laboral, a regulación da seguridade social, a Administración de xustiza nas materias en que a lexislación sexa de competencia nacional galega, o rexistro civil e notariado, o réxime urbanístico e a ordenación do territorio, a política cultural e educativa e a política sanitaria. A política e planificación económica recoñecíase tamén como competencia nacional galega coa nacionalización de recursos económicos e a creación dun banco público galego.

“Cincuenta anos despois, a proposta das Bases Constitucionais aínda continúa a ser ambiciosa para a nosa realidade actual, e as competencias que recoñecían para Galiza seguen a marcar o camiño cara ao recoñecemento do dereito de autodeteminación para que o pobo galego poida decidir libremente o seu futuro e avanzar cara un modelo político e social propio que mellore a vida das galegas e galegos”, sinala Lucía López.

Neste sentido, de xeito paralelo, BNG e FGS están a desenvolver unha análise das 50 competencias que Galiza tería que asumir "se houbera vontade política porque precisamos recuperar a iniciativa e non temos dúbida de que existe unha maioría social que é consciente de que é necesario un maior autogoberno para un futuro mellor para Galiza", afirma Rubén Cela.

En canto ao proxecto económico, elaborado por Camilo Nogueira e Ramom López Sue-vos, o documento recollía medidas para os sectores industrial, agrario e pesqueiro e tamén para a ordenación do espazo e as comunicacións. Contemplaba así a creación dun sector público industrial e comercial, a aposta polas cooperativas agrarias e pesqueiras, o control da política fiscal, financeira, educativa e de investigación, laboral e social.

De onte a hoxe nunha xornada de conmemoración

A Portavoz Nacional do BNG, Ana Pontón e o presidente da Fundación Galiza Sempre, Rubén Cela abrirán o sábado 18 de abril na Escola Técnica Superior de Enxeñaría da USC a xornada de conmemoración, que iniciará o seu programa cunha mesa de análise sobre a importancia das Bases Constitucionais no seu contexto histórico a cargo de Pilar Allegue e Francisco Rodríguez.

A xornada inclúe tamén a esa redonda "50 anos despois das Bases Constitucionais: cara onde camiña o estado español?" na que participarán o representante do BNG no Congreso dos Deputados, Néstor Rego; o senador e EH-Bildu, Mario Zubiaga e a deputada de ERC no Congreso, Etna Estrems.