BNG acorda co Goberno medidas complementarias de apoio ao sector pesqueiro galego
Néstor Rego confirma: cursos de formación para garantir o relevo xeracional, estudo sobre a produtividade das Rías Galegas e estabelecemento de SWAPS para aumentar as cotas de raia, xarda e lirio
O deputado do BNG sinala a necesidade de continuar a traballar para defender o sector: “Co BNG, a pesca galega gaña”
O Bloque Nacionalista Galega (BNG) vén de acordar co Goberno do Estado medidas de apoio ao sector pesqueiro galego, complementarias das recollidas do RDL anticrise, que responden a algunha das reclamacións do sector en relación coa ampliación das cotas de raia, xarda e lirio, coa produtividade das rías e co revezamento xeracional nun ámbito -o da pesca- fundamental para a economía e o tecido social da Galiza.
O deputado do BNG no Congreso, Néstor Rego, destaca que “este acordo recolle medidas necesarias para atender algunhas demandas do sector pesqueiro galego, apostando pola formación, o coñecemento científico e a mellora da capacidade operativa”.
Formación a bordo do buque Intermares
“O Ministerio de Pesca deberá pór en marcha un plan de formación pesqueira para mozos e mozas a bordo do buque-escola Intermares para garantir o revezamento xeracional no sector” anuncia Néstor Rego sinalando que esta medida procura facilitar o acceso ao sector, ofrecendo capacitación directa para atallar un dos problemas que está encontrando a frota galega, o de persoal cualificado.
Nun contexto onde o sector precisa incorporar man de obra nova e ante as dificultades actuais, o BNG sinala que esta medida formativa “é fundamental” para garantir a continuidade da actividade e ofrece oportunidades laborais cualificadas.
As Rías Galegas e a súa produtividade
Outro dos puntos acordados entre o BNG e o Goberno do Estado é a realización dun estudo exhaustivo sobre a produtividade das Rías Galegas. “Pesca encargará ao Instituto de Oceanografía -que ten dous centros punteiros na Galiza- un estudo sobre a produtividade das Rías Galegas fundamentalmente para determinar o que xa é unha evidencia, que é a perda de produtividade e, polo tanto, para estabelecer cales deben ser as medidas correctoras e as actuacións necesarias para restaurar a calidade ambiental plena e a produtividade das nosas Rías”
Segundo explica a organización nacionalista, o estudo científico permitirá contar con datos sólidos e garantir a sustentabilidade das Rías, un dos principais motores económicos da Galiza.
Intercambio de cotas con terceiros países
O acordo inclúe o compromiso de estabelecer mecanismos de intercambio de cotas (SWAPS) con terceiros países e frotas, co obxectivo de aumentar as posibilidades de captura de especies de grande importancia para o sector pesqueiro galego.
“O obxectivo é aumentar a cota de raia, xarda e lirio. Unha das reclamacións que está a demandar o sector pesqueiro galego para garantir a viabilidade e a continuidade da actividade económica” afirma o deputado do BNG no Congreso.
O deputado do BNG valora moi positivamente as medidas acordadas e empraza o MAPA a poñelas en práctica canto antes.
