BNG acusa o PP de “tomarlle o pelo” á veciñanza de Rodeiro tras negarse a poñer data de remate aos accesos da parcelaria
Ariadna Fernández cualifica de “paripé” a primeira visita en dous anos a conselleira ao Concello “para sacarse unha foto coas palas nun camiño”
A deputada nacionalista lembra que a concentración parcelaria de Val de Camba foi aprobada hai xa 18 anos: “Van finalizar antes das eleccións?”
A deputada do BNG pola comarca do Deza, Ariadna Fernández, acusou o Partido Popular de “tomarlle o pelo” á veciñanza de Rodeiro tras negarse en comisión parlamentaria a poñerlle data á finalización dos traballos de mellora dos accesos, principais e secundarios, aos predios da concentración parcelaria de Val de Camba.
Unha negativa que considerou especialmente “vergonzosa” porque se produciu xusto un día despois de que a conselleira de Medio Rural, María José Gómez, se presentase en Rodeiro para “facer o paripé”, “coa nota de prensa feita, para sacarse unha foto cun mapa e coas palas nun camiño”.
Criticou, neste punto, que a conselleira tardase ademais dous anos en visitar o concello e que o fixese precisamente o día antes de debaterse a iniciativa rexistrada polo BNG no Parlamento para reclamar o inicio das obras dos camiños, que o Consello da Xunta comprometera para o primeiro trimestre deste ano.
“A conselleira foi facer o paripé a Rodeiro para deslexitimar sen ruborizarse o traballo da oposición nesta comisión”, denunciou, ao tempo que reprobou que a Consellería xestione os recursos dos galegos e as galegas “a salto de mata”, utilizando os cartos públicos para “caciquear”.
“Irían a Rodeiro se non se rexistrarse a iniciativa do BNG?”, cuestionou durante o debate en Comisión, no que tamén lle afeou á conselleira non ter recibido aínda, tras máis de dous anos á fronte de Medio Rural, a representantes do concello que así llo pediron.
Durante a defensa da iniciativa parlamentaria, que recollía as reclamacións da veciñanza, Fernández amosou a disposición do BNG a negociar co grupo maioritario sempre e cando no texto se recollese expresamente o compromiso do PP na Xunta a rematar os accesos “antes do inverno” deste ano, cuestión que non foi aceptada.
“Vai ser antes das eleccións?”, preguntou ás bancadas populares a deputada do BNG, que non obtivo resposta malia que, tal e como subliñou, a concentración parcelaria de Val de Camba foi aprobada en 2008 e os veciños e as veciñas levan agardando desde hai moito tempo polos camiños secundarios e as melloras das vías principais de acceso aos predios da zona de reestruturación, co que iso implica para a utilidade e comodidade dos propietarios das parcelas.
A deputada nacionalista criticou a “total incapacidade do PP” á hora de amosar “un mínimo de interese” polo medio rural e por unha concello no que o 42 % dos ocupados traballan no agro. “Gandeiros e gandeiras que están preocupados pola chegada da peste porcina africana, pola dermatose nodular, pola falta de superficie agraria útil, o abandono das terras ou a suba de prezos dos combustibles e dos fertilizantes ou os incendios”, destacou, lamentando a falta de resposta por parte da Xunta ante as principais inquedanzas do sector.
En concreto, a proposta do BNG para negociar co PP reclamaba “seguir impulsando os procesos de reestruturación parcelaria como un instrumento que permite incrementar a superficie agraria útil á vez que se mellora a rede de camiños e os accesos ás parcelas agrícolas, tal e como se está a facer na zona de concentración parcelaria de Val de Camba, onde se rematarán os traballos de mellora de viais principais, secundarios e o acceso aos predios antes do inverno do 2026”.
