BNG pon en evidencia quen é o PP ao negarse a buscar solucións xustas e favorables para a veciñanza de Monte Mero
Mercedes Queixas: “Mentres a Xunta só ve tellados, nós vemos 200 persoas que teñen alí as súas vidas, recordos, terras, pasado e arraigo”
A deputada do BNG Mercedes Queixas reclamoulle á Xunta de Rueda continuar dialogando coa veciñanza de Monte Mero para estudar cada caso de forma individual e ofrecerlle solucións xustas, favorables e individualizadas. Pide que se rexeiten alternativas homoxéneas que non teñen en conta a diversidade de situacións familiares e patrimoniais das persoas afectadas polo Proxecto de Interese Autonómico (PIA), destinado á construción de vivenda pública na Coruña. Algo que o PP asegurou que “xa está a facer”.
O PP votou en contra alegando que xa está a realizar o que o BNG reclamaba na iniciativa, ao que Queixas retrucou que “se é así, se todo está en marcha, por que vostedes, que son deputadas e deputados coma nós, votan en contra? Que estratexia é a que están seguindo? Que falacia están seguindo? preguntou. “É moi curioso”
Na súa intervención na Comisión 2ª, Queixas recordou que o Goberno galego non comezou a recoñecer a existencia desa veciñanza ata que esta se mobilizou para esixir diálogo e solucións, deixando claro que “Monte Mero existe desde moito antes de que o PP puxese os ollos no PXOM”. Tampouco a Xunta moveu un dedo ata que o BNG trasladou a situación ao Parlamento, engadiu.
Foi entón cando a Xunta abriu unha vía de diálogo e mellorou a súa postura inicial —na que chegou a ofrecer apenas un solar como compensación— para contemplar agora a oferta dunha vivenda alternativa. “Para o BNG, iso non é suficiente, substituír un tellado por outro tellado non é o mesmo que garantir unha solución xusta para cada familia”, aclarou,
“Mentres a Xunta só chega a ver tellados, nós vemos arredor de 200 persoas que viven en Monte Mero, que teñen alí a súa vida, os seus recordos, terras, historia familiar, emocións, pasado, todo o máis importante que posúe unha persoa ou familia: o arraigo e o apego”, expresou Queixas. Recriminoulle así á Xunta que queira impoñer un PIA nas súas terras, ignorando que hai xente que vive alí. “Faino asoballando, sen comunicación nin diálogo”
“O PP empeza a atender a veciñanza pero non empeza a entender” porque ofrecen como solución alternativa a perder casa, a vivenda ou o terreo, a construción dunha única vivenda”, advertiu.
A deputada nacionalista agradeceulle aos populares “a súa transparencia” para que tanto os veciños e veciñas da Coruña como o resto de galegos e galegas, “saiban quen é o PP e anunciou que o BNG seguirá traballando para que as familias de Monte Mero teñan solucións xustas.
