BNG acusa o PP de impulsar a especulación do patrimonio costeiro: “A Lei do Litoral converteuse nunha chiringuitada”

Luís Bará critica que a principal medida impulsada por Rueda ao amparo da norma sexa ampliar a tempada e as licencias para locais a pé de praia

Mentres, seguen pendentes de aprobarse as directrices de ordenación do litoral ou os plans de ordenación costeira e mariña, advirte o deputado

O portavoz de Medio Ambiente do BNG, Luís Bará, denuncia a “especulación” que o Goberno do PP está facendo arredor do patrimonio costeiro do País, a través dunha “explotación intensiva” de zonas con valores ambientais e da proliferación de establecementos turísticos e chiringuitos nun contexto de desregulación e desprotección do litoral. “Para isto era para o que quería Rueda as competencias do litoral”, asegura o deputado.

“O balance dos dous anos e medio da Lei do Litoral de Galiza pódese resumir en dúas palabras: unha chiringuitada”, critica Bará, argumentando que durante este tempo "a medida estrela impulsada polo Goberno de Rueda foi a ampliación da tempada de chiringuitos desde Semana Santa a outubro, sete meses, e o récord, supostamente, de 400 establecementos de este tipo autorizados”.

Fronte ao “interese desmedido” por aprobar medidas encamiñada á “especulación a toda costa”, constata unha “falta de interese pola xestión integral”, posto que o Goberno do PP non aprobou ningún dos instrumentos de planificación e ordenación previstos na lei de xullo de 2023, como son as Directrices de Ordenación do Litoral, que tiñan que estar aprobadas dous anos despois, no mesmo mes de 2025, e aínda non se presentaron.

O mesmo sucede, explica o deputado nacionalista, co Plan de Ordenación Costeira, que tamén tiña que estar aprobado dous anos despois da entrada en vigor da lei e segue pendente, ou o Plan de Ordenación Mariña, do que tampouco hai noticia malia que debería recibir luz verde en xullo deste ano.

“Esta preguiza normativa do PP non é casual, porque as prioridades do PP son encher a costa de chiringuitos, promover unha rede de establecementos turísticos ou unha senda costeira que debería desenvolverse no Plan de Ordenación Costeira que se retrasa , precisamente de maneira intencionada”, engade.

No mesmo sentido, o portavoz de Medio Ambiente do BNG critica que o PP deixase sen efecto “unha boa parte” do Plan de Ordenación do Litoral (POL) de 2011 porque, segundo explica, “iso facilita que se estean autorizando campamentos turísticos, bungalows ou cabanas turísticas en zonas clasificadas como de mellora ambiental ou de protección costeira”.

“Todo estes feitos van na mesa dirección: especulación arredor do patrimonio costeiro, explotación intensiva de zonas con valores ambientais e proliferación de establecementos turísticos e chiringuitos; unha situación de desregulación e desprotección da que se benefician os amigos de Rueda”, conclúe.

https://www.bng.gal/articulo/novas/bng-acusa-pp-impulsar-especulacion-do-patrimonio-costeiro-lei-do-litoral-converteuse-nunha-chiringuitada/20260329135616042534.html