BNG exixe a rectificación do Goberno e promover unha avaliación ambiental integral para a subestación de Abegondo

Néstor Rego denuncia a fragmentación na avaliación da subestación de Abegondo e acusa o Goberno do Estado de facilitar a súa tramitación

“O Goberno debe abandonar a fragmentación e promover unha avaliación ambiental integral que teña en conta o conxunto das infraestruturas e os seus efectos acumulativos” sinala

O Bloque Nacionalista Galego denuncia a actuación cómplice do Goberno do Estado por permitir a tramitación fragmentada do proxecto da subestación eléctrica de Abegondo. Néstor Rego, deputado do BNG, sinala que esta práctica reduce as garantías ambientais e dificulta unha avaliación rigorosa do impacto real da infraestrutura e do conxunto dos proxectos asociados.

O deputado do BNG no Congreso critica con dureza a falta de transparencia e planificación neste procedemento, advertindo de que “non se pode analizar por separado o que forma parte dun mesmo modelo enerxético depredador; estamos ante unha fragmentación intencionada para facilitar autorizacións que, doutro xeito, serían moito máis cuestionadas”.

Após todo o traballo realizado pola organización nacionalista, o Goberno sempre se limitou a responder sinalando que a subestación estaba incluída na planificación enerxética estatal 2021-2026, sen entrar a valorar as críticas sobre a fragmentación nin as consecuencias ambientais. Finalmente, en novembro de 2025 autorizouse a subestación de 400 kV, e en xaneiro de 2026 a de 220 kV.

Para o BNG, esta infraestrutura forma parte do “boom eólico” desordenado que está a sufrir a Galiza, caracterizado pola proliferación de proxectos sen planificación global, con fortes impactos ambientais e sociais, e con graves deficiencias na súa avaliación.

Néstor Rego denuncia que “non se realizou unha avaliación ambiental conxunta das subestacións, das liñas de evacuación e dos parques eólicos asociados, o que impide coñecer o impacto acumulativo real sobre o territorio”. Ademais, sinala que esta situación “deixa en situación de indefensión á veciñanza afectada, que leva anos mobilizándose sen obter respostas claras”.

O deputado do BNG alerta das posíbeis afeccións sobre a Reserva da Biosfera das Mariñas Coruñesas e Terras do Mandeo, así como sobre o patrimonio natural, cultural e a calidade de vida da poboación local.

Ante esta situación, Rego exixe ao Goberno “abandonar a práctica de fragmentar proxectos e promover unha avaliación ambiental integral que teña en conta o conxunto das infraestruturas e os seus efectos acumulativos”.

A organización nacionalista conclúe que a tramitación separada das distintas partes do proxecto non é casual, senón unha estratexia que “reduce as garantías legais e ambientais, facilitando a autorización de infraestruturas de alto impacto que contan cun amplo rexeitamento social e institucional no territorio”.

Finalmente, a formación nacionalista lembra que todos os grupos políticos do Concello de Abegondo, así como a propia veciñanza, manifestaron reiteradamente a súa oposición á instalación desta subestación, reclamando respecto polo territorio e un modelo enerxético sustentábel e planificado.

https://www.bng.gal/articulo/novas/bng-exixe-rectificacion-do-goberno-promover-avaliacion-ambiental-integral-subestacion-abegondo/20260401110132042543.html