BNG rexeita a entrada en vigor provisional do acordo UE-Mercosur anunciada por Von der Leyen

A eurodeputada do BNG, Ana Miranda, subliñou que o Bloque Nacionalista Galego rexeita a entrada en vigor de forma provisional do acordo Unión Europea-Mercosur que hoxe anunciou a presidenta da Comisión Europea, Úrsula Von der Leyen, debido aos efectos negativos que este acordo ten sobre o sector agrogandeiro galego.

A eurodeputada galega denuncia que, con esta decisión, estase a vulnerar a opinión do Parlamento Europeo ao executarse antes de que teña lugar a votación definitiva no pleno da Eurocámara. Ademais, denuncia “que se está a vulnerar esa consulta ao Tribunal de Xustiza Europeo e, por suposto, a voz das labregas e labregas, a voz das tractoradas, a voz do sector agrogandeiro, tamén do noso país que se mobilízoa durante varios meses”.

O BNG é a única forza política coherente coa defensa do sector agrogandeiro galego, ao rexeitar este novo acordo entre a Unión Europea e o Mercosur, debido aos grandes prexuízos que supón este tratado para un sector fundamental e estratéxico para a economía galega, en especial para as pequenas e medianas explotacións galegas. “Estáse vulnerar a voz dos pobos europeos coa entrada en vigor deste tratado”, sinala Ana Miranda.

Carta a Von der Leyen

Neste sentido, a eurodeputada galega considera que a vulneración da consulta ao Tribunal de Xustiza Europeo prodúcese porque no pleno do pasado mes de xaneiro o Parlamento Europeo aprobou (con 334 votos a favor, 324 en contra e 11 abstencións) trasladar este acordo a ese Tribunal para que ditamine se o acordo é compatible cos tratados europeos. Para o Bloque este acordo foi xestionado de forma non democrática en tanto que a Comisión Europea como o Consello saltaron todos os principios de cooperación entre institucións para aprobar un acordo pola porta de atrás.

Precisamente a eurodeputada do BNG remitiu unha carta, xunto con outras eurodeputadas e eurodeputados de diferentes grupos da Eurocámara, dirixida á presidenta da Comisión Europea, Ursula Von der Layen, na que instan á Comisión “a que non avance na aplicación provisional do acordo comercial UE-Mercosur, nin de ningunha das súas partes, até que o Tribunal de Xustiza Europeo emita o seu ditame”. A carta enviada a Von der Layen tamén fai referencia as consideracións de varios comisarios, que xa ofreceron garantías de que non aplicarían provisionalmente acordos comerciais antes de que o Parlamento Europeo outorgara o seu consentimento.

https://www.bng.gal/articulo/novas/bng-rexeita-entrada-vigor-provisional-do-acordo-ue-mercosur-anunciada-von-der-leyen/20260227175212042326.html