Comunicado da Executiva Nacional do BNG de apoio ao pobo cubano

A Executiva do Bloque Nacionalista Galego (BNG) amplía a súa condena anterior para denunciar enerxicamente as dúas novas e graves medidas adoptadas polo goberno dos Estados Unidos baixo a administración de Donald Trump, que representan unha perigosa escalada da política de asfixia económica e agresión contra a República de Cuba.

A Executiva nacional do Bloque Nacionalista Galego (BNG) manifesta a súa máis firme e rotunda condena polo recente aprofundamento do bloqueo económico, comercial e financeiro contra a República de Cuba por parte do goberno dos Estados Unidos de América.

Denunciamos:

• Que a Orde Executiva asinada o 29 de Xaneiro de 2026, e o bloqueo petroleiro, que baixo o pretexto dunha falsa "emerxencia nacional", declara a Cuba unha "ameaza inusual e extraordinaria" para a seguridade dos EUA. O obxectivo práctico desta medida é impoñer aranceis punitivos a calquera país que forneza petróleo a Cuba, buscando estrangular por completo unha das vías de subministración enerxética vital para a illa. Esta acción é un chantaxe descarado á comunidade internacional, unha violación do dereito internacional e un ataque directo que pretende paralizar a xeración eléctrica, o transporte, a produción agrícola e os servizos sanitarios básicos do pobo cubano.
• Que a inclusión de Cuba na Lista de Estados Patrocinadores do Terrorismo, carece de toda base real. Cuba é un país de paz, cunha longa traxectoria de solidariedade e cooperación internacional. A designación como "patrocinador do terrorismo" impón sancións financeiras extraterritoriais que paralizan o comercio e o investimento internacional con Cuba, impedindo transaccións bancarias e créditos, e agravando a crise económica.
• Que estas medidas, insírense nunha política de máis de seis décadas de asfixia sistemática ao pobo cubano, constitúe un acto de clara violación do Dereito Internacional e da Carta das Nacións Unidas. O bloqueo é un castigo colectivo que atenta directamente contra os dereitos humanos máis básicos da poboación civil, limitando o seu acceso a medicinas, alimentos, recursos sanitarios e desenvolvemento económico.

O BNG considera que estas accións forman parte dunha estratexia concertada de "máxima presión" para provocar o colapso económico, xerar unha crise humanitaria artificial e forzar un cambio de réxime contra a vontade soberana do pobo cubano.

O BNG, fiel aos seus principios de solidariedade internacionalista, defensa da autodeterminación dos pobos e rexeitamento a calquera forma de imperialismo ou inxerencia, considera inaceptábel que no século XXI se manteñan e reforcen este tipo de políticas coercitivas unilaterais. Estas accións non só causan sufrimento á nación cubana, senón que vulneran a soberanía e o dereito de Cuba, como calquera outro Estado, a escoller libremente o seu sistema político, económico e social.

Diante desta situación o BNG:

1. Condena sen paliativos a orde executiva do 29 de xaneiro como un acto de guerra económica contra Cuba, que viola todos os principios do Dereito Internacional e da Carta das Nacións Unidas.
2. Rexeita absolutamente a infundada e cínica inclusión de Cuba na lista de patrocinadores do terrorismo, unha ferramenta política sen lexitimidade.
3. Fai un chamamento á Unión Europea, ao Goberno de España, á Xunta de Galiza e á comunidade internacional para que non se presten a este chantaxe, rexeiten estas medidas unilaterais e tomen accións contundentes para protexer o dereito á vida e á autodeterminación do pobo cubano.
4. Reitera a súa solidariedade inquebrantábel co pobo e o goberno lexítimo de Cuba nesta nova e difícil etapa de loita pola súa soberanía.

https://www.bng.gal/articulo/novas/comunicado-da-executiva-nacional-do-bng/20260203125639042178.html