A portavoz de Facenda do BNG, Noa Presas, emprazou o Goberno “trapalleiro” do PP a cambiar a “chapuza fiscal” que fixeron coas rebaixas no material escolar pola recuperación da gratuidade universal dos libros de texto, na que Galiza foi vangarda hai vinte anos. “Recortaron dereitos e agora venden unha esmola como se fora a panacea”, asegurou.

O BNG apoio co seu voto a lei tramitada polo procedemento de urxencia para corrixir o “parche mal feito” na Lei de Acompañamento dos Orzamentos e permitir que as familias que pagaron os libros e material escolar con cartos en efectivo poidan tamén acollerse á rebaixa no IRPF. “Está ben que rectifiquen a súa chapuza porque habería centos de persoas discriminadas no próximo exercicio da renda e non imos obstaculizalo”, argumentou.

Porén, máis alá de arranxar a “chapuza lexislativa” do PP, Presas situou o “debate de fondo” na eficacia dunha “medida propagandística” —a desgravación fiscal— fronte á gratuidade dos libros que defende o BNG e que o PP suprimiu cando chegou á Xunta, cando “quixeron ser campións dos recortes da dereita”. “Iso é o que deberían corrixir por lei”, sostivo.

“Acceder ao material escolar non pode ser un obstáculo para ningún neno ou nena e ten que estar garantido de forma gratuíta no ensino, combinando gratuidade e préstamo”, argumentou neste punto a deputada nacionalista, quen cifrou nuns 40 millóns de euros o que lle suporía esta medida á Consellería de Educación, cun orzamento que supera os 3.000 M€.

Fronte á gratuidade universal, considerou que as desgravacións que defende o PP son “propaganda para facer que fan e con pouca efectividade”, porque as axudas “non chegan a todo o mundo e “deixan no limbo” moitos fogares e porque é un “alivio en diferido” que “pouco lle fai a unha familia para sacar o pescozo da auga” xa que a rebaixa na declaración da renda chega un ano despois de ter que “facer malabarismos” para afrontar no inicio de curso un gasto mínimo de 400 euros por fillo ou filla.

Presas destacou, no mesmo sentido, que a suba acumulada de prezos nos últimos dez anos é dun 50 %, polo que a desgravación fiscal é “un parche”. Tamén é, agregou, unha “manobra de distracción para tapar a situación na que está hoxe o ensino público deste País despois de anos e anos de recortes” dun Goberno do PP que aplicou a tesoira non só para eliminar a gratuidade dos libros de texto, senón tamén para recortar o salario do profesorado, ao que se aumentaron as horas lectivas, e para reducir profesorado (2.500 docentes menos entre 2009 e 2019 no ensino non universitario).

A deputada nacionalista recordou que a comunidade educativa vaise mobilizar esta fin de semana e referiuse ao día de hoxe como un “martes negro” no ensino galego, un “martes de loita nos centros, onde profesorado, pais, nais, nenos e nenas están defendendo o ensino galego, máis persoal, especialmente para a atención á diversidade, máis transparencia, negociación, menos burocracia, recuperar o horario lectivo de antes da crise e baixar os rateos”.

Respecto da tramitación polo procedemento de urxencia da lei debatida hoxe, Presas insistiu na “trapallada lexislativa” dos populares e dun goberno no que presumen de ser “bos xestores”, ironizou, e que “ano tras ano” aproveitan a Lei de Medidas de Acompañamento dos orzamentos “con premeditación e aleivosía” para “meter pola porta de atrás todo tipo de cambios legais”.

“Reformaron 50 leis e 15 decretos que nada tiñan que ver cos orzamentos sen contar co espectáculo que nos deron coas súas propias emendas”, subliñou a portavoz de Facenda do BNG no Parlamento, que lamentou que o PP non tivese errado á hora de dar alas á patronal enerxéticas, ao favorecer a expansión do eucalipto ou ao recortar as normas de habilitabilidade para que os galegos e as galegas “durman en pisos máis pequenos que as habitacións de hoteis nas que dormen vostedes cando van de retiro”.

https://www.bng.gal/articulo/novas/bng-reclama-ao-goberno-trapalleiro-do-pp-que-cambie-chapuzas-fiscais-pola-gratuidade-universal-dos-libros-texto/20260224130437042293.html