BNG denuncia a situación de “caos” pola improvisación do PP na implantación da oficinal xudicial

O deputado do Bloque Nacionalista Galego, Iago Tabarés, alertou durante a sesión plenaria da "situación de caos" que se vive nos tribunais de instancia dos sete grandes partidos xudiciais de Galiza, especialmente no de Ourense, convertido "unha vez máis" en "experimento" da Xunta. Tabarés denunciou a "falta de planificación e improvisación" do Goberno do PP na posta en marcha da oficina xudicial, cando apenas transcorreu un mes desde a súa implantación nas sete cidades.

"Falamos coa avogacía, falamos coa procura, falamos cos corpos de auxilio, de tramitación e de xestión, falamos cos distintos sindicatos e créame, todas, todas absolutamente empregaron a palabra caos", afirmou o deputado nacionalista, quen reclamou ao conselleiro de Presidencia, Xustiza e Deportes: "Tome a xustiza en serio, dialoguen, planifiquen, tome medidas urxentes". Tabarés subliñou que a situación é "caótica" e puxo como exemplo que aínda non está en funcionamento o programa de xestión Atenea, "nin en castelán nin en galego, malia que se comprometeron".

Durante a súa intervención, o deputado do BNG detallou as múltiples deficiencias detectadas: "Fallan o acceso dos traballadores ás aplicacións que lle permiten traballar, que lle permiten entrar nos expedientes; expedientes amoreados, en moitos casos non se poden localizar; cambios de localización de postos de traballo, cinco veces en sete días; colapso no rexistro, está pendente de rexistrar actuacións, demandas, por exemplo, de novembro". Tabarés chegou a denunciar que "algún compañeiro atopou a firmeza nunha resolución que estaba recorrida, pero que ocorre que non se deu nin sequera rexistro a esa apelación".

O nacionalista fixo especial fincapé na situación das funcionarias e funcionarios, "perdidos nos seus postos e nas súas funcións", e denunciou que están a realizar tarefas que non lles corresponden por lei. "Pilas de expedientes amoreadas no chan, problemas de repartición do traballo con cambios de normas varias veces no mesmo día, falla de coordinación, problemas de todo tipo". Tabarés mostrou no hemiciclo fotografías que ilustraban estas deficiencias.

Finalmente, o deputado do BNG exixiu ao goberno do PP que asuma as súas responsabilidades e deixe de converter Ourense nun campo de probas. "A Lei Orgánica 1/2025 deulle un prazo de practicamente un ano para planificar esta transición e vostedes actuaron cunha inusitada premura, sen información individualizada, sen protocolos específicos para servizos chave como gardas ou violencia de xénero. O resultado é que temos máis de 4.000 asuntos en tramitación e case 9.000 pendentes de execución, e esta desorganización só vai agravar o atasco xudicial. Isto non é serio, señor conselleiro, e a xustiza non pode permitirse estes experimentos", concluíu.

https://www.bng.gal/articulo/novas/bng-denuncia-situacion-caos-pola-improvisacion-do-pp-implantacion-da-oficinal-xudicial/20260211141501042224.html