“Nestes dous anos de lexislatura vimos a verdadeira cara do estilo Rueda, a dun PP instalado no ruído e na crispación que quere traer á política galega a lameira da política madrileña, a dun presidente que vai pasar á historia por ser o máis antigalego e centralista, sempre servil ás ordes do PP en Madrid en contra dos intereses dos galegos e as galegas”, asegurou a deputada do Bloque.
Proba disto é o rexeitamento do Goberno do PP á condonación da débeda negociada polo BNG no acordo de investidura, máis de 4.000 millóns de euros que poderían servir para mellorar os servizos públicos no País, cada día máis deteriorados, como ocorre coa sanidade, a educación ou a atención á dependencia, exemplificou Rodil. No mesmo sentido, criticou a negativa de Rueda a negociar, dobregado ás ordes de Génova, un sistema de financiamento xusto para Galiza, a través de un concerto que lle dea aos galegos e galegas a chave dos seus cartos.
Segundo a deputada do BNG, os dous anos transcorridos desde a celebración das últimas eleccións galegas deixan claro que o estilo Rueda é tamén o dun goberno que traballa “para un puñado de empresas amigas do PP ás que está poñendo en bandexa os recursos e a riqueza de Galiza única e exclusivamente para que poidan seguir engordando a súa carteira de beneficios”.
Altri, un claro exemplo
Sucede isto, sostivo, co “boom eólico depredador pensado só para favorecer os intereses das eléctricas” ou coas políticas feitas para beneficiar o lobby do eucalipto, aínda que o “o exemplo máis claro” é o proxecto da macrocelulosa contaminante de Altri en Palas de Rei. “O Goberno do PP foi o gran impulsor deste proxecto industrial absolutamente prexudicial para Galiza”, apuntou, para subliñar que se finalmente a pasteira non chega a materializarse será grazas á masiva mobilización veciñal e social.
“A xente dixo claramente non ao espolio dos nosos recursos e si a un modelo de desenvolvemento económico e social sustentable que poña os recursos e a riqueza do País ao servizo das galegos e os galegos”, salientou.
A viceportavoz do BNG no Parlamento criticou o triunfalismo de Rueda á hora de facer balance dun goberno que, insistiu, traballa de costas á xente, sen atender os problemas reais dos galegos e as galegas. Referiuse, neste punto, a situación que atravesa a sanidade pública, “cada vez máis deteriorada como consecuencia das decisións políticas do PP na Xunta, que teñen a Atención Primaria en estado crítico, con listas de agarda de ata quince días para ver o médico ou 11.000 nenos e nenas sen pediatra asignado”.
Olalla Rodil aludiu así mesmo ao fracaso da xestión do PP en materia de vivenda, sendo esta hoxe o “principal factor de exclusión social”. “É imposible poder pagar o aluguer, cada vez máis caro neste País, entre outras cousas porque o Partido Popular dinamitou durante os últimos dezaseis anos a política social de vivenda”, reprobou.
A situación do sistema da dependencia é outra das marcas que caracterizan, agregou a deputada nacionalista, o estilo Rueda na Xunta. “Temos o Servizo de Axuda no Fogar colapsado e listas de espera inadmisibles que o único que favorecen é o negocio que están facendo un puñado de empresas coa vellez, como ocorre coas residencias”, denunciou.
Olalla Rodil fixo tamén valoración do traballo do BNG durante estes dous anos de lexislatura. Un BNG, apuntou, que despois de ter acadado o mellor resultado da súa historia nas últimas eleccións galegas, continúa a traballar como alternativa de Goberno “cada día con máis ilusión e con máis forza para dar resposta, solucións e esperanza á xente deste País”.
“Traballamos cun proxecto serio e de futuro centrado no importante, que é defender os intereses de Galiza e o dereito das galegas e dos galegos a unha vida digna, e cun liderado forte, sólido e claro como é o de Ana Pontón, que é o símbolo da esperanza deste País e a alternativa de goberno para Galiza”, concluíu.
