BNG saca adiante no Congreso a iniciativa para garantir a actividade e o emprego no Grupo Losán
Néstor Rego consegue aprobar no Congreso unha resolución que reclama ao Goberno do Estado, a través da SEPI, adoptar un papel activo e participar no deseño dun plan de viabilidade do Grupo
“Os recursos públicos non poden servir para sanear as contas das empresas e que logo estas marchen cara a outro lugar” afirma Rego
O Congreso aproba a iniciativa do BNG, defendida por Néstor Rego, que reclama ao Goberno do Estado un papel activo para garantir a continuidade da actividade e o mantemento dos postos de traballo no Grupo Losán a través da SEPI. O deputado do BNG tamén consegue o apoio da cámara baixar para que se estabelezan mecanismos que impidan a deslocalización de empresas que reciben axudas públicas.
A iniciativa do BNG debatida e votada no Congreso ten por obxectivo que o Goberno do Estado, concretamente os Ministerio de Industria e Facenda, actúe para salvagardar a actividade e os postos de traballo nun sector fundamental como é a madeira no Grupo Losán, que na Galiza posúe dúas fábricas: a de Curtis e a de Vilasantar, con máis de 200 traballadores e traballadoras.
Durante a crise da COVID-19, o Grupo Losán percibiu un montante considerábel de axudas públicas, concretamente nun préstamo participativo de 21,6 millóns e outro ordinario de 13,4 millóns. “Chama a atención -sinala Rego durante a defensa da iniciativa- que Losán fechase o exercicio 2022, cunha facturación de 343,6 millóns, xerando lucros, e que apenas 3 anos despois estea en crise.
O certo é que, a pesar dos elevados ingresos, das achegas da SEPI, doutros 7 millóns do IGAPE e de contar tamén con 19 millóns en avais do ICO, hai traballadores e traballadoras que levan catro meses sen percibir o seu salario. “A empresa non executou o plan de reestruturación da débeda conforme ao pactado, o que derivou nun agravamento da situación económica e o inicio de despedimentos colectivos e está poñendo en cuestión a continuidade da actividade” enfatiza Rego.
“Non só están en risco os postos de traballo senón tamén o coñecemento e a experiencia dun Grupo que foi referente e impulsor durante décadas, converténdose nunha referencia do sector da madeira” alerta o deputado nacionalista.
Aprobados ambos os puntos da iniciativa do BNG
“Adoptar un papel activo e, a través da SEPI como entidade investidora, estabelecer canles de comunicación coa dirección da compañía, a Xunta da Galiza e os comités de empresa das fábricas ASERPAL e LOSAN para participar no deseño dun plan de viabilidade para o Grupo Losán que asegure o mantemento da actividade industrial e dos empregos” recolle o primeiro punto aprobado da iniciativa nacionalista.
Por outra parte, para “poñer couto” ao fenómeno da deslocalización, o BNG logra sacar adiante unha resolución en que insta o Goberno a “avaliar o resultado dos investimentos públicos no sector industrial e impulsar as reformas precisas que garantan que as empresas que reciban fondos públicos manteñan unha actividade estábel e duradeira así como os postos de traballo sen que poidan acudir a ERES, fechamentos e/ou deslocalizacións”.
