Pontón pregunta a Rueda se vai limpar as franxas de seguridade en concellos de menos de 10.000 habitantes como anunciou no Parlamento
Advirte que o prazo remata o 31 de maio para uns municipios que precisan unha “medida clave” para a seguridade de persoas e vivendas ante os lumes
Denuncia que a Xunta só restaurou 6.000 das 120.000 hectáreas queimadas o verán pasado e aínda está tramitando o 67% das axudas
Defende unha moratoria indefinida real do eucalipto, un monte multifuncional e aumentar a restauración de todas as zonas afectadas por incendios
A portavoz nacional, Ana Pontón, preguntou desde A Rúa ao presidente do Executivo, Alfonso Rueda, se vai cumprir o anuncio que realizou no Parlamento de executar as franxas de protección en todos os concellos de menos de 10.000 habitantes, dado que o prazo para acometer a medida remata en apenas un mes.
“Queremos lembrar que o prazo acaba o 31 de maio e, polo tanto, queremos saber se esas franxas van a estar executadas antes desta data ou simplemente estamos ante unha nova mentira do presidente da Xunta”, advertiu Pontón, quen remarcou que esta é unha medida anunciada como “estrela” polo propio Rueda e que resulta “clave” para garantir a seguridade das persoas e das vivendas nos 257 municipios que teñen menos de 10.000 habitantes.
A portavoz nacional desprazouse ata A Rúa onde, xunto á rexedora María Albert e o deputado Secundino Fernández, avaliou con representantes dos sectores produtivos máis afectados pola vaga de lumes do pasado mes de agosto a situación actual en Valdeorras, unha das comarcas que sufriron en maior medida un “fatídico verán” que supuxo a destrución dunha parte moi importante do territorio, incluídas vivendas, e o desaloxo de miles de persoas.
Unha vaga de lumes, afondou, cuxas consecuencias seguen sendo evidentes nove meses despois, con miles de hectáreas arrasadas sen recuperar e ao que sumou os problemas derivados das choivas nas zonas afectadas polas lapas na Rúa, que arrastraron as cinzas até provocar a contaminación das augas. “Xa advertiamos que isto ía a ser un problema se non actuaba e, lamentablemente, vemos que a situación é moi grave”, remarcou.
“O que comprobamos nove meses despois é que a Xunta segue sen estar á altura porque só se actuou en 6.000 das 120.000 hectáreas ardidas e a maioría das axudas non só é que non foron pagadas, e que nin tan sequera foron concedidas”, denunciou, para sinalar a continuación que un 67% desas axudas “a día de hoxe aínda se están tramitando”. “Polo tanto, temos a un Goberno galego e a un presidente que non cumpren coa súa palabra”, reprobou.
Pontón lamentou que o Executivo de Rueda “non aprendera nada desta vaga de lumes” e, na vez de poñer en marcha cambios estruturais, estea repetindo as mesmas políticas que levaron ao País a esta situación, no que considerou unha “irresponsabilidade terrible”.
Fronte “á irresponsabilidade e as mentiras do PP”, a líder nacionalista defendeu as medidas que presentou xusto despois dos incendios o goberno alternativo do BNG no Plan da Cinza á Vida, no que aposta por un cambio radical no modelo forestal para que o monte galego deixe de ser un eucaliptal e Galiza un polvorín.
A atención inmediata ás persoas afectadas -con axudas rápidas, burocracia cero e apoio integral-, a recuperación ambiental das zonas queimadas, a posta en marcha dun novo modelo forestal ou a mellora do dispositivo de extinción para poder actuar fronte a uns lumes “moi diferentes aos de hai 20 anos” son algunhas das liñas estratéxicas dun plan que contempla un amplo abano de medidas concretas.
Entre elas, apuntou en primeiro lugar á axuda rápida e eficiente a todas as persoas afectadas, dado que “nove meses despois, unha parte moi importante das persoas que solicitaron axudas seguen sen telas pola burocracia e polo deseño das mesmas que fixo a Xunta”, remarcou, tras urxir ao Executivo a abonar as axudas ás que teñen dereito.
En segundo lugar, considerou de especial importancia cambiar a ordenación do territorio e camiñar cara a un monte multifuncional, cunha ordenación en mosaico que permita previr os incendios e cunha aposta pola diversidade de usos e polas especies autóctonas. Neste sentido, tamén avogou por unha moratoria indefinida e real fronte á “irresponsabilidade” dun Goberno do PP que continúa favorecendo a extensión desta especie en pleno cambio climático.
A portavoz nacional defendeu tamén a mellora do dispositivo de extinción con persoal contratado todo o ano e coa formación precisa para poder actuar ante estes incendios de nova xeración e a restauración real de todas as zonas afectadas polos lumes, dado que a Xunta “non está a recuperar” unhas hectáreas arrasadas, cuxa recuperación debería evitar ademais que esas zonas volvan arder “ano tras ano”.
“Quero dicirlle a todos os veciños e veciñas da comarca de Valdeorras, e tamén ao conxunto dos galegos e das galegas, que é posible un monte vivo e multifuncional e un rural onde non haxa abandono e ese o empeño desde o que estamos traballando no BNG”, sinalou, para avanzar que o Bloque vai seguir insistindo en que “os incendios apáganse no inverno con prevención, con ordenación e cun rural vivo”. “Lamentablemente, temos a un goberno da Xunta irresponsable que non aprendeu nada desta vaga de lumes e que segue cometendo os mesmos erros”, concluíu.
Pola súa parte, a alcaldesa da Rúa advertiu que o concello leva arrastrando as consecuencias dos lumes do pasado verán todo o inverno e que este pasado domingo aínda se manifestou con toda a súa virulencia, cunha “escorrentía grandísima” que evidencia a problemática derivada dos incendios.
“Levamos unha semana moi compricada, con afectación sobre todas as zonas de abastecemento, tal e como levamos sufrindo durante todos estes meses nos que a Xunta practicamente non fixo ningún traballo de restauración do terreo”, denunciou. A isto sumou o feito de que as axudas comprometidas polo Goberno de Rueda, sobre todo no sector vitivinícola, “non se están a materializar”, o que trasladou á portavoz nacional co obxectivo de denunciar a situación no Parlamento. “Os concellos que sufrimos os incendios e os afectados, tanto particulares como produtores e empresas, teñen que ter unha resposta dunha Administración que non está a facer o seu labor a día de hoxe”, concluíu.
