BNG centrará o Pleno na sanidade pública tras certificar Contas o estado crítico no que se atopa a Atención Primaria

Olalla Rodil denuncia as “consecuencias nefastas” que ten para a saúde das e dos galegos as políticas sanitarias que aplica o Goberno de Rueda

“Se Rueda non é responsable de nada e nada sabe, o mellor que pode facer é dedicarse a andar en bici e deixar que goberne outra persoa”, ironiza

O BNG volverá levar ao Pleno os problemas que de verdade preocupan aos galegos e as galegas e por iso a portavoz nacional, Ana Pontón, vai centrar a súa pregunta a Rueda no estado crítico no que se atopa a sanidade pública e, máis en concreto, a Atención Primaria, tal e como vén de constatar nun demoledor informe o Consello de Contas.

Así o avanzou a viceportavoz nacionalista no Parlamento, Olalla Rodil, quen explicou que Pontón interrogará a Rueda sobre esta cuestión tras vetar o PP a súa comparecencia, “como é habitual e costume” canto se trata de abordar as preocupacións da xente. Neste caso, a perda de calidade da atención sanitaria reflectida por Contas e “as consecuencias nefastas para a saúde das galegos e dos galegos que ten a política sanitaria do Goberno do PP na Xunta”.

“Se Rueda non é responsable de nada e nada sabe, o mellor que pode facer é dedicarse a andar en bici e deixar que goberne outra persoa”, ironizou Rodil sobre os motivos expostos polo presidente da Xunta para non responsabilizarse do informe de Contas.

Un informe demoledor que constata, mais unha vez, o que o BNG denuncia desde hai anos, poñendo de relevancia, entre outras cuestións, que Galiza é a segunda comunidade, despois de Madrid, con menor investimento na Atención Primaria, que só absorbe un 12 % do gasto sanitario, cifra “afastadísima” do 25 % recomendado pola OMS.

Tal e como explicou Rodil, Pontón tamén pedirá a Rueda explicacións pola “cobertura insuficiente e desigual”, especialmente no rural, no que ten que ver coa atención sanitaria infantil posto que , segundo confirma Contas, ata 160 concellos galegos, o 60 % do total, carecen de pediatra, e outros 96 teñen que compartir o servizo.

A iniciativa do BNG, o presidente da Xunta terá que responder así mesmo polas consecuencias que está a ter a falta de persoal en toda a estrutura do Sergas, cun 28 % de prazas vacantes. “Hai categorías fundamentais como as matronas, nas que Contas sitúa as vacantes en seis de cada dez prazas”, explicou Rodil, que destacou, neste punto, “as listas de espera inadmisibles” que vulneran o dereito dos e das galegas a recibir unha atención sanitaria de calidade, próximo e accesible.

Recuperar concesións hidráulicas

Entre as iniciativas que o BNG vai presentar para o seu debate no próximo pleno figura, por outra banda, unha proposición non de lei para que a Xunta recupere para o público as concesións hidráulicas que caducaron, como é o caso das do río Tambre, que se atopan na demarcación Galiza Costa, competencia da Xunta.

“Falamos duns dereitos de explotación, até o de agora en mans de Naturgy, que están a xerar enormes beneficios empresariais sen reverter en absoluto no territorio e na xente do País”, salientou a deputada nacionalista que, a modo de exemplo, explicou que unha minicentral das caducadas de 2,3 MW pode producir uns 14GWh o que, cun custe de produción que non supera os 10 €, supón ingresos superiores aos 2 millóns de euros.

A proposta do Bloque pasa por que as concesións recuperadas sexan xestionadas por unha empresa pública galega de enerxía, “de maneira que a riqueza de Galiza contribúa ao desenvolvemento económico e social deste País, non a seguir engordando o negocio dun puñado de empresas que nin sequera contribúen aquí”.

Volver ao consenso lingüístico

Ás portas do 17 de maio, o BNG tamén defenderá no Pleno unha iniciativa para que de maneira urxente se apliquen as medidas aínda vixentes do Plan de Normalización Lingüística de 2003, co obxecto de recuperar o consenso lingüístico que “rachou” o PP e reverter a perda de falantes e mesmo o descoñecemento das xeracións máis novas da lingua propia.

“Despois do informe demoledor do IGE sobre a situación crítica da lingua galega seguimos sen saber absolutamente nada de que pensa facer a Xunta para garantir os dereitos lingüísticos das galegas e dos galegos”, criticou Rodil, para cuestionarse a continuación sobre si realmente o PP “o único que quere é que todo siga igual”.

Lugo: uso de cartos públicos para manobras escuras

A través doutra iniciativa no Pleno, o BNG esixirá explicacións e responsabilidades ao Goberno de Rueda polo “uso partidista” da Xunta e dos recursos públicos “que son de todas e todos os cidadáns do País” para “favorecer operacións e manobras políticas como a indigna e indecente moción de censura de Lugo.

Rodil reiterou, neste punto, que tanto a conselleira de Medio Ambiente como Rueda “mentiron” sobre a xefatura territorial do litoral en Lugo despois de que o Bloque advertise publicamente de que a Xunta convocou a praza a medida da edil tránsfuga que precisa o PP para a moción de censura.

“Rueda dixo que renunciara o día 21, oh casualidade, o mesmísimo día que sacan a praza. Nunca tal velocidade tivo a Administración!. Sería curioso se non fose mentira proque, insisto, onte luns 27 de abril esa persa, que é unha vítima máis dos chanchullos do PP, estaba no seu posto de traballo”, expuxo.

https://www.bng.gal/articulo/novas/bng-centrara-pleno-sanidade-publica-certificar-contas-estado-critico-que-atopa-atencion-primaria/20260428144301042699.html