Pontón destaca ante o Goberno de Lula da Silva as vantaxes de Galiza para acoller investimentos de vangarda desde Brasil
A portavoz nacional, Ana Pontón, mantivo un encontro coa ministra brasileira da Mulher, Márcia Lopes, na que trasladou ao Goberno de Lula da Silva o atractivo e as vantaxes de Galiza para acoller investimentos de vangarda procedentes de Brasil, así como a potencialidade que teñen as empresas e os sectores produtivos galegos para incrementar as relacións comerciais co país americano.
“Somos un País que ten uns sectores económicos que teñen moito que ofrecer e tamén somos unha terra onde as empresas brasileiras poden poñer en marcha os seus proxectos de vangarda, tecnolóxicos e respectuosos co medio ambiente”, sinalou a líder do BNG tras poñer en valor a vocación atlántica que comparten ámbolos dous países en sectores como a pesca, a acuicultura ou a construción naval.
Nunha reunión na que estivo acompañada pola eurodeputada e responsable da Área de Internacional, Ana Miranda, e que se celebrou onte ás 16 h, hora local, Pontón tamén salientou a importancia da lingua á hora de ampliar e reforzar as relacións económicas e culturais entre Galiza e Brasil.
“Temos un nexo común que nos une que é a lingua e esta é unha ponte que nos permite comunicarnos e unha vantaxe tanto desde o punto de vista da relación económica, como desde a cultural”, indicou, para poñer en valor a fortaleza que dá a ámbolos dous países compartir un idioma común.
Neste contexto, avogou por fortalecer vínculos e ampliar as relacións económicas e culturais tamén en ámbitos como o da universidade ou o da investigación, impulsando un maior intercambio universitario e a colaboración investigadora, particularmente en áreas como as ciencias do mar, a biotecnoloxía, a lingua e a cultura.
Outro dos asuntos abordados na reunión coa ministra da Mulher estivo centrado loxicamente nas políticas de igualdade. “Queremos coñecer as políticas que está aplicando o Goberno de Brasil neste ámbito e, ao mesmo tempo, tamén lle trasladamos a experiencia de goberno do BNG na defensa das mulleres, na loita pola igualdade e na promoción de políticas públicas para acabar coa violencia de xénero”, afondou Pontón, quen compartiu a súa preocupación con Lopes polo avance do discurso regresivo e negacionista da violencia machista por parte da extrema dereita, a un lado e outro do Atlántico.
Por iso e fronte á “onda machista e regresiva” que quere volver ás mulleres “para atrás”, avogou por fortalecer as políticas públicas que protexen a igualdade, que implican máis dereitos e que permiten construír unha sociedade máis igualitaria, é dicir, máis democrática.
“Temos que reforzar ás mulleres nun momento no que hai unha extrema dereita que quere levarnos para atrás e as mulleres o que temos é que seguir dando pasos para adiante porque queda moita igualdade por conquistar”, concluíu.
A portavoz nacional continuou xunto á responsable da Área de Internacional a súa axenda no marco do 8º Congreso do Partido dos Traballadores do presidente Lula da Silva con diversos encontros bilaterais. Entre eles, o que mantivo co responsable da Secretaría de Relacións Internacionais do PT e vicepresidente segundo do Senado, Humberto Costa, con quen compartiu as posicións do BNG en relación a asuntos como a situación internacional, os conflitos bélicos ou a involución de dereitos e liberdades pola expansión da extrema dereita, a ámbolos dous lados do Atlántico.
