BNG alerta do risco de peche de explotacións pola rebaixa do prezo do leite e urxe ao PP a poñerse do lado do sector

Ariadna Fernández acusa a Medio Rural de permanecer “inmóbil” diante da crise que afecta ás e os gandeiros, agravada agora polos efectos da guerra

“Producimos o 42 % do leite do Estado e temos unha posición de forza que a Xunta non é capaz de poñer en valor nas negociacións coa industria”

A portavoz de Industrias Agroalimentarias do BNG, Ariadna Fernández, denunciou o “inmobilismo” da Consellería de Medio Rural diante da amenza de peche de explotacións gandeiras no País a consecuencia da entrada en vigor, dentro de apenas 48 horas, dos contratos á baixa no prezo do leite, que implicarán que os produtores e produtoras reciban “sete, oito ou máis céntimos” menos por litro.

“Con esta baixada drástica ponse en risco a continuidade de moitas explotacións de vacún, que verán os seus beneficios drasticamente”, advertiu a deputada, subliñando que esta redución nos ingresos das explotacións leva o sector a unha crise aínda máis grave porque ao mesmo tempo está pagando os efectos da “guerra imperialista” de Estados Unidos e Israel en Oriente Próximo.

Efectos que, ademais, prodúcense “xusto no momento no que a actividade agrícola se volve máis intensa” porque é precisamente agora cando nas explotacións hai que abonar, segar, recoller e volver sementar, cando máis traballan os tractores, o que fai que a suba de prezos no gasóleo agrícola, dos abonos ou dos plásticos sexa “inasumible”.

“As marxes de beneficio van ter uns recortes que ameazan a viabilidade de moitas explotacións”, asegurou a deputada nacionalista, que recordou que só o ano pasado tiveron que pechar xa máis de 300 explotacións de leite e que Galiza pasou de ter 9.100 explotacións de 2015 ás menos de 5.000 da actualidade.

Diante desta situación, criticou que a Consellería de Medio Rural, “que máis parece do anti rural” -ironizou-, se manteña como “espectadora”, dándolle as costas a un sector que aínda agarda que se publiquen as axudas para mitigar os efectos da guerra e que paga as consecuencias do “inmobilismo” dun goberno que, diante da baixa do prezo do leite, se limita a apelar á boa vontade da industria.

“Os gandeiros e as gandeiras precisan un goberno que goberne”, sostivo Fernández, que emprazou o Executivo de Rueda a “poñerse de lado” dos produtores e produtoras do País para “facer valer” a súa “posición de forza” no Estado como subministradora de leite.

Destacou, neste punto, que Galiza produce o 42 % do leite do Estado (que é deficitario nuns 2,3 millóns de litros) e oferta un produto de gran calidade, cunha media de proteína e graxa que supera a media. E, malia iso, historicamente págase menos polo leite galego.

“É inxustificable que levemos anos cobrando menos por litros, deixándose de ingresar millóns de euros nos petos dos gandeiros e gandeiras galegas”, considerou, para advertir que o 75% destas considera que non ten capacidade negociadora fronte á industria. “Os produtores estanos dicindo que chegan os contratos e, ou asinan, ou non lles recollen o leite”, explicou.

É por iso que a deputada nacionalista emprazou o Goberno do PP a convocar de inmediato a produtores, industria e distribución para negociar “en igualdade de condicións”, asumindo a Consellería de Medio Rural o papel “protagonista” que debería ter co obxectivo de mellorar o trato ás explotacións galegas.

“Os nosos produtores/as teñen que ser tomados en serio, porque son a sucursal do leite no Estado, e porque a industria sabe que o son”, recalcou, subliñando que mentres Galiza aumentou a súa produción, pasado das 214.000 toneladas de leite no 2015 ás 257.000 do ano pasado, a cifra no resto do Estado mantense estable, e o peche de explotacións é máis acelerado.

Ademais de tomar as rendas na negociación para facer valer o sector galego, Fernández emprazou o Goberno de Rueda a aumentar as axudas da Xunta ao campo para paliar os efectos da guerra porque, segundo dixo, aínda que se descoñece a contía exacta das mesas, si se sabe que van ser moito menores que as de Cataluña ou Euskadi: en torno aos 150 millóns de euros en total fronte aos 400 aprobados pola Generalitat ou os máis de 1.000 do Goberno vasco.

Ariadna Fernández reclamou á Consellería de Rueda un “cambio de rumbo” porque, sinalou, do papel que xogue na actualidade dependerá o futuro do sector agrogandeiro galego e do rural. Un sector que, agregou, sofre tamén a ameaza da falla de relevo xeracional nas ganderías.

Só o 3 % dos gandeiros ten menos de 30 anos de idade, precisou, para criticar que, aínda con esas cifras, o Goberno galego ten ser resolver as axudas de 2025 para a incorporación de mozos ao agro e o 70 % dos plans de mellora de explotacións que se solicitaron no 2024 foron rexeitados.

“O Goberno do PP non pode manterse inmóbil, porque hai un sector que precisa agora mesmo, e de xeito esaxerado, que se lle teña en conta, e que o que estea gobernando que goberne e que non se dedique a dar bandazos ou a non facer absolutamente por un sector que segue a perder explotacións e que se se segue nesa dinámica está abocado á desaparición”, concluíu.

https://www.bng.gal/articulo/novas/bng-alerta-do-risco-peche-explotacions-pola-rebaixa-do-prezo-do-leite-urxe-ao-pp-ponerse-do-lado-do-sector/20260330141403042537.html