BNG exixe destinar o gasto en Defensa a “defender verdadeiramente a xente despregando medidas de protección social”

Carme da Silva reclama ao Goberno a saída do Estado español da OTAN: “o non á guerra é incompatíbel co si á OTAN”

“Vivimos constantemente guerras imperialistas polo control dos recursos. Esta é unha guerra anunciada. Trump é un criminal e Netanyahu, un xenocida” denuncia

“Ése moi estrito para o gasto en educación, en sanidade... Mais non se é estrito no caso de aumento do gasto militar” critica mentres lamenta que a Vicepresidenta abra a porta a activar a cláusula de escape e incumprir as regras para destinalo a Defensa

A senadora do BNG, Carme da Silva, aproveita a comparecencia da Vicepresidenta Primeira e Ministra de Facenda para reclamar ao Goberno do Estado destinar o incremento do gasto en Defensa a medidas de protección social ante a inflación e suba de prezos pola guerra imperialista impulsada polos Estados Unidos e o Estado sionista de Israel. A organización nacionalista sinala que as consecuencias desta guerra non as poden pagar as maiorías sociais e urxe levar a cabo medidas de protección social.

Durante a comparecencia no Senado da Ministra de Facenda, María Jesús Montero, o BNG alerta de que o incremento do orzamento para Defensa “non é puntual senón un incremento a futuro” que obrigará ao Estado español a chegar “até 5% do gasto total”. “Isto é destinar a incremento do gasto militar en 2025, o dobre do que a Xunta de Galiza gasta en Sanidade” exemplifica a senadora nacionalista.

Ante esta situación, e co obxectivo de que as maiorías sociais non volvan pagar novamente as consecuencias da guerra, Carme da Silva reclama a Montero que non se destinen os recursos de defensa á guerra senón “a defender verdadeiramente a xente despregando medidas de protección social”.

“As guerra detraen recursos de políticas sociais: vivenda, sanidade, investigación, educación, dependencia, etc. O Goberno do Estado non pode renunciar a destinar esa cantidade de recursos. Está moi ben o non á guerra mais ten que continuar con accións que demostren que se está en contra da guerra” incide Carme da Silva durante a comparecencia de Montero.

Segundo sinala a senadora do BNG, o incremento dos beneficios da industria armamentística estadounidense é absolutamente obscena e obedece a unha lóxica belicista: “vivimos constantemente guerras imperialistas polo control de recursos. Esta é unha guerra anunciada onde Trump é un criminal e Netanyahu, un xenocida” denuncia.

Así mesmo, a senadora do BNG exixe ao Goberno incluír un reforzo de gasto ante un escenario inflacionista onde as diferentes administracións públicas verán incrementados os gastos e habilitar un mecanismo para que as entidades públicas poidan facer frente a este aumento dos custos. “Son gastos básicos que as administracións locais e autonómicas deberán asumir. Son consecuencias directas da guerra” evidencia, convidándoa a defender a xente das consecuencias da guerra.

Por último, Carme da Silva lamenta que a Vicepresidenta abra a porta a que o Goberno do Estado “poida, nun futuro, activar a cláusula de escape e incumprir as regras de gasto para aumentar as partidas do gasto militar”. A senadora do BNG sinala que xa se está detraendo recursos doutras partidas para incrementar o gasto en Defensa –a través de modificacións orzamentarias- e denuncia que o Goberno do Estado e a Unión Europea “son moi estritos para o gasto en educación, en sanidade... Mais non se é estrito no caso de aumento do gasto militar”.

https://www.bng.gal/articulo/novas/bng-exixe-destinar-gasto-defensa-defender-verdadeiramente-xente-despregando-medidas-proteccion-social/20260311144700042398.html