BNG mantén a proposta para adxunto á Valedora tras o veto político dun PP que volve amosar o seu talante antidemocrático

A viceportavoz do BNG no Parlamento, Olalla Rodil, avanzou que a formación nacionalista non vai aceptar o “veto político” do PP e, polo tanto, vai manter a proposta do profesor de Dereito Administrativo da USC Fernando de Abel Vila como candidato a adxunto á Valedora do Pobo.

“É intolerable e non o imos aceptar”, asegurou Rodil despois de que o PP trasladase á formación nacionalista o veto á súa proposta, o que supón unha “ruptura dos acordos, do costume e unha falta de respecto institucional”. Trátase, engadiu, dun “feito inaudito que responde única e exclusivamente a un veto político” dos populares que, máis unha vez, volven demostrar o seu “talante antidemocrático e o nulo respecto polo pluralismo”.

Rodil subliñou a “folla de servizo intachable” de Fernando de Abel Vilela, que é profesor do Departamento de Dereito Público e Teoría do Estado na Universidade de Santiago e que, ademais, cumpre todos os requisitos legais para ser adxunto á Valedora do Pobo.

A deputada nacionalista lembra que, segundo a tradición parlamentaria, correspóndelle ao BNG como segunda forza nomear candidato ou candidata para o cargo de adxunto á Valedora e destaca que, malia o veto do PP, seguirá adiante coa súa proposta, que terá que ser debatida na Comisión de Peticións.

O BNG lembra ademais o perfil de persoas que ocuparon anteriormente a vicevaledoría, como Antonio Pol, quen fora alcalde franquista de Arzúa entre 1964 e 1968, e de Lugo, entre 1974 e 1975. Fora tamén gobernador civil da Coruña e Salamanca e deputado por Alianza Popular (AP) entre 1982 e 1986.

Tamén Domingos Merino chegou á valedoría logo de ser alcalde da Coruña pola coalición Unidade Galega e deputado, primeiro polo PSG-EG e máis tarde polo BNG, no Parlamento galego. Igualmente, a anterior adxunta á Valedora, María Xosé Porteiro, foi concelleira, deputada e destacada militante do Partido Socialista.

Olalla Rodil expresou a posición do BNG sobre a renovación de cargos na Valedora do Pobo tras a reunión da Xunta de Portavoces na que se estableceu a orde do día do próximo Pleno, no que, a proposta do grupo nacionalista, debaterase a creación dunha comisión de investigación sobre as presuntas irregularidades e “os desmáns do Goberno do PP” na tramitación do proxecto de Altri en Palas de Rei.

“Aínda hai que deitar moita luz onde o PP o único que quere é poñer sombra”, destacou a viceportavoz, que detallou que a comisión que reclama o BNG céntrase na descatalogación da contorna da Serra do Careón como zona de amortecemento da Rede Natura, unha descatalogación que beneficiaba a Altri e que vén de ser declarada ilegal por parte do Tribunal Superior de Xustiza de Galiza (TSXG).

Máis en concreto, Rodil explicou que o BNG quere saber “en termos políticos” que departamento ou organismo da Xunta tramitou a modificación da protección que tiñan eses terreos, que informes técnicos avalaron ou xustificaron esa desprotección e en que momento se levou a cabo ese cambio.

O Goberno de Rueda, engadiu Rodil, ten que aclarar se a desprotección dos terreos foi feita antes de que a Xunta asinase, a través da Sociedade Impulsa, o acordo secreto con Altri que non quere dar a coñecer, e se o cambio na catalogación era, precisamente, unha das contrapartidas á pasteira lusa contidas nese documento de 2021.

Ademais da creación da comisión de investigación, o BNG reclamou na Xunta de Portavoces a comparecencia de Rueda para falar tamén da toma de decisións, como a da contorna da Serra do Careón, tomadas polo seu Goberno “en contra dos intereses dos galegos e galegas e a favor da rapina dunha empresa portuguesa que o único que quería eran os nosos recursos naturais para encher a súa carteira de negocios”.

Como o PP vetou a comparecencia, a formación nacionalista formulará unha interpelación sobre esta cuestión.

No mesmo sentido, a pregunta ao presidente da Xunta da portavoz nacional, Ana Pontón, será “se ten algún proxecto industrial para Galiza ou vai seguir instalado no fracaso e na propaganda”. “Porque de todo o que Rueda anunciou como os grandes proxectos industriais para Galiza non se verificou nin un só”, denunciou Rodil.

“Realmente o PP ten moi pouco ou nada que ofrecerlle en materia industrial ás galegas e aos galegos, nada que non sexa volver a implantar fábricas que seguen o modelo industrial do franquismo na vez de proxectos sustentables baseados nos recursos e no desenvolvemento social, económico e humano do noso País”, salientou.

https://www.bng.gal/articulo/novas/bng-manten-proposta-adxunto-valedora-veto-politico-dun-pp-que-volve-amosar-seu-talante-antidemocratico/20260303145352042348.html