BNG esixe a dimisión da conselleira de Medio Ambiente trala sentenza firme do Supremo sobre o embalse das Conchas
A deputada do BNG Sonia Vidal esixiu a dimisión da conselleira de Medio Ambiente, Ángeles Vázquez trala sentenza firme do Tribunal Supremo que confirma que o Goberno do PP na Xunta incurmpriu as súas obrigas ante a contaminación por nitratos no Embalse da Conchas, vulnerando dereitos fundamentais da veciñanza da comarca da Limia e da Baixa Limia.
“A sentenza di que existía coñecemento previo, que as medidas foron insuficientes, que houbo risco certo para a vida e para a integridade e que se vulneraron os dereitos fundamentais”, lembrou.
Fíxoo durante a pregunta urxente en Pleno na que Vidal subliñou que a sentenza deixa claro que existía "coñecemento previo" por parte da Xunta, que as medidas adoptadas foron "claramente insuficientes" e que houbo un "risco certo para a vida e para a integridade" das persoas afectadas. A deputada lembrou que o goberno galego leva no poder desde 2009, que os expedientes sancionadores se acumulan desde hai máis de unha década, que en 2022 xa existían mapas oficiais de contaminación difusa e que a Directiva de Nitratos data de 1991.
"Isto non é improvisación. Non é descoordinación. Non é falta de información. Isto é permitir durante anos un deterioro progresivo sabendo o que estaba pasando. Iso ten un nome: abandono institucional”, recalcou, incidindo en que “non é trabapallada, non é propaganda, é un feito gravísimo: a vulneración de dereitos fundamentais durante anos por inacción administrativa”.
A deputada criticou duramente a resposta da conselleira, que segundo Vidal reduciu un problema competencial. Fronte a iso, a parlamentaria do BNG lembrou que o presidente Alfonso Rueda afirmou que haberá que "analizar de onde veñen os nitratos", o que cualificou de “inadmisible” tendo en conta os antecedentes documentados.
Vidal reclamoulle á conselleira que respondese a tres preguntas concretas: se vai asumir responsabilidades políticas, se vai activar de inmediato medidas estruturais con calendario e orzamento, ou se vai continuar "botando a culpa a Madrid". Na súa réplica final, a deputada foi contundente: Por responsabilidade institucional, por respecto á veciñanza da Limia de da Baixa Limia e por dignidade democrática, debería asumir as consecuencias políticas desta situación. E se non está disposta a facelo, a conclusión é evidente: debería dimitir”.
