BNG reclama explicacións e medidas urxentes ao Goberno polas graves incidencias na liña ferroviaria Ourense-Ponferrada

O Bloque Nacionalista Galego vén de rexistrar nas Cortes do Estado unha batería de iniciativas dirixidas ao Goberno sobre as incidencias producidas os días 17 e 18 de febreiro na liña ferroviaria Ourense-Ponferrada. O deputado do BNG no Congreso exixe que se esclarezan as causas e revisar de forma integral a infraestrutura, así como impulsar plans específicos de inspección, revisión e reparación periódica das infraestruturas.

O deputado do BNG no Congreso, Néstor Rego, cualifica os feitos como “moi graves” e denuncia que “volven pór en evidencia o abandono e a falta de mantemento das infraestruturas ferroviarias na Galiza”.

Na mañá do mércores 18 de febreiro, arredor das 7:40 horas, o tren convencional que cubría a liña entre Ponferrada e Ourense quedou parado á altura do Ivedo, entre as estacións de Montefurado e San Clodio, tras unha avaría que, segundo as primeiras informacións, estaría relacionada coa catenaria e o pantógrafo. No tren viaxaban 20 persoas, entre elas crianzas e persoas con mobilidade reducida, que tiveron que ser evacuadas polos servizos de emerxencia e a través de camiños rurais até Montefurado para seren posteriormente trasladadas en taxi e autobús.

Segundo relataron persoas usuarias, escoitouse un forte estrondo, como un lóstrego, e observaron chispas antes de quedar sen subministración eléctrica. Ademais, denuncian que permaneceron máis dunha hora sen información clara por parte da operadora ferroviaria.

Esta incidencia produciuse apenas un día despois de que, na mañá do martes 17 de febreiro, se rexistrase un incendio nun túnel próximo a Montefurado que obrigou a cortar a liña León-Monforte, afectando conexións con Ponferrada, León, Ourense e mesmo o servizo entre A Coruña e Barcelona. O xestor da infraestrutura ferroviaria, Adif, indicou que sería precisa unha revisión técnica antes de restabelecer o tráfico.

Para o BNG, estas incidencias “non son feitos illados, senón a consecuencia directa da falta de inspección, mantemento e investimento nas infraestruturas ferroviarias galegas”.

“Non abonda con actuar cando xa se produciu a avaría ou o incendio. É imprescindíbel un plan sistemático de revisión da vía, da catenaria, dos túneles, noiros e da vexetación do entorno, que permita previr situacións de risco e garantir a seguranza das persoas usuarias” subliña Néstor Rego.

Ante esta situación, o BNG reclama ao Goberno esclarecer con total transparencia cal foi a causa exacta da avaría producida o 18 de febreiro e que se determine se efectivamente se debeu á catenaria e ao pantógrafo e concrete que factores provocaron o fallo. “Debe explicar, ademais, porque a operadora non informou de maneira áxil e suficiente ás persoas viaxeiras afectadas, deixándoas sen comunicación durante máis dunha hora” puntualiza.

Do mesmo xeito, a organización nacionalista quere coñecer as causas do incendio do pasado 17 de febreiro e faga públicos os resultados da investigación. Posteriormente, Néstor Rego incide na necesidade de que se leve a cabo unha revisión integral da infraestrutura afectada polo incendio e se informe de se foron detectados danos estruturais.

“Deben ser reforzados os protocolos de seguranza e estabelecer medidas de mantemento preventivo sistemático en toda a rede ferroviaria galega, así como impulsar plans específicos de inspección, revisión e reparación periódica das infraestruturas, especialmente, tendo en conta as condicións meteorolóxicas adversas habituais na Galiza” reclama Rego.

“O dereito a un transporte ferroviario seguro e de calidade non pode depender da sorte nin das condicións meteorolóxicas. A Galiza precisa investimentos, mantemento continuado e unha planificación seria para evitar que estas situacións se repitan” finda.

https://www.bng.gal/articulo/novas/bng-reclama-explicacions-medidas-urxentes-ao-goberno-polas-graves-incidencias-lina-ferroviaria-ourense-ponferrada/20260219111917042260.html